Phenchhan-2018: Alǵashqy oıyndar qaı kúni bastalatyny belgili boldy
ASTANA. QazAqparat - XXIII qysqy Olımpıada oıyndarynyń alǵashqy irikteý jarystary qashan bastalatyny belgili boldy, dep habarlaıdy QazAqparat tilshisi.
XXIII qysqy Olımpıada oıyndarynyń resmı ashylý saltanaty 9 aqpanǵa josparlanǵan. Al resmı jabylýy 25 aqpanda ótedi. Alaıda, alǵashqy irikteý jarystary 8 aqpan kúni bastalady. Bul kúni kerlıng jáne tramplınnen sekirýden jarystar bastalyp ketedi.
Bul Ońtústik Koreıadaǵy jarys Sapporo (1972) men Naganodan (1998) keıin Azııa qurlyǵynda ótetin úshinshi qysqy Olımpıada oıyndary bolmaq.
Osyǵan deıin habarlaǵanymyzdaı Phenchhan qysqy Olımpıadany ótkizýge úshinshi ret talasqan bolatyn. Buǵan deıin 2010 jyly Vankýverge, keıin Reseıdiń Sochı qalasyna jol berip qoıǵan edi.
2018 jylǵy Olımpıada oıyndaryna 95 ulttyq Olımpıadalyq komıtettiń atynan 2 900 sportshy qatysady dep kútilýde. Onda barlyǵy 102 medal jıyntyǵy sarapqa salynady.
Jarys eki klasterde ornalasqan 12 sport nysanynda ótedi.
