PHEF-2018 qatysýshylary qazaqstandyq ulttyq kompanııalarǵa ınvestıtsııa salýǵa shaqyryldy
PHEF-2018 sharasynda sóz alǵan «Samuryq-qazyna» AQ Basqarma tóraǵasy Ahmetjan Esimov forým qatysýshylaryna Qor kompanııalaryna ınvestıtsııa salýdyń artyqshylyqtary týraly aıtyp berdi jáne jekeshelendirý baǵdarlamasyna qatysýǵa shaqyrdy.
«Samuryq-Qazyna» qory somasy 74 mıllıard AQSh dollarynan asatyn jáne túrli ekonomıka salalaryn qamtıtyn Qazaqstannyń joǵary sapaly aktıvteriniń eń iri qorjynyna ıe», - dep atap ótti A.Esimov.
Osy rette Qor basshysy Qazaqstanda reseılik kapıtaldyń qatysýy bar 8300-den astam kásiporyn jumys isteıtinin aıtyp ketti.
Qazaqstandyq ekonomıkanyń damý perspektıvasy týraly «Samuryq-Qazyna» Aq Strategııalyq damý jónindegi basqarýshy dırektory Baljıt Greval aıtyp berdi.
«Qazaqstan ekonomıkasynyń qalaı bólinetinine qarasaq, basty salalardyń negizinen energetıka men óndiriste ekenin kóremiz. Osyǵan qaramastan, sońǵy birneshe jyldyń ishinde kólik jáne logıstıka, sonymen qatar ınfraqurylym áleýetin aıtarlyqtaı arttyra aldy», - dep atap ótti B.Greval.
Ol, sondaı-aq, osy jyly ekonomıkalyq ósim boıynsha boljamnyń 4% deńgeıinde saqtalatyny týraly aıtty.
«Qazaqstan 2030 jylǵa qaraı shıki munaı eksporttaýshylardyń ondyǵyna kirýdi josparlap otyr. Bul - eldiń strategııalyq ekonomıkalyq maqsattary. 2014 jyly úkimet aýqymdy Transformatsııa baǵdarlamasyn jarııalady, onyń aıasynda bıznes pen barlyq ulttyq kompanııalar qamtyldy. Biz jańa bıznes-protsester, úzdik standarttardy engizdik. Biz naryqtyq reformalardyń kelesi kezeńine daıynbyz», - dep sózin aıaqtady Qordyń Basqarýshy dırektory.
«Samuryq-Qazyna» AQ-nyń málimdeýinshe, bolashaq ınvestorlar birqatar artyqshylyqtarǵa ıe bolady, olardyń qatarynda Qazaqstan naryǵyna ashylatyn jol, ekonomıkadaǵy úlesin azaıtýdy maqsat etken memlekettiń qoldaýy men qatysýyna ıe bolý, ınvestıtsııalyq klımatty jaqsartýǵa baǵyttalǵan zańdar jáne alýan túrli jekeshelendirý nusqalary bar.
