PhD dárejesin alǵan jastar ýnıversıtetke barmaı jatyr – mınıstr

ASTANA. QazAqparat – Jastar PhD ǵylym dárejesin alyp, ýnıversıtetke jumys isteýge barmaıdy. Bul týraly Májiliste ǵylymdy damytý taqyrybyndaǵy Úkimet saǵatynda QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«Jas ǵalymdarǵa qatysty aýqymdy taldaý júrgizdik. Biz ne úshin granttardy berip jatyrmyz? Jastar PhD-di qorǵaı almaı ketedi nemese olar PhD dárejesin qorǵap, joǵary oqý oryndaryna, sondaı-aq ǵylymı zertteý ınstýttaryna barmaıdy. Keıbiri onda 1-2 jyl jumys istep, ketip qalady. Jastar ǵylymǵa az keledi. Osy máseleni zerttegende, birneshe shekteý bar ekenin anyqtadyq», - dedi S. Nurbek.

Onyń aıtýynsha, PhD dárejesin qorǵaý úshin halyqaralyq bedeldi jýrnaldarǵa ǵylymı maqala jarııalaý kerek. Ekinshiden, jas ǵalym PhD-di qorǵap, joǵary oqý ornyna kelgende, ol oqyǵan 4 jyl eseptelmeıdi. Ol aǵa oqytýshy, professor dárejesine konkýrsqa tapsyra almaıdy.

«Sondyqtan olar qınalady, jalaqy da az bolady. Kúndelikti ómirdegi qarbalas bastalady. Bul máselelerdi eskere otyryp, olar ǵylymnan ketip qalady. 2021 jyly qabyldanǵan zańnyń aıasynda jas ǵalymdarǵa arnalǵan granttardy iske qostyq. Bul – jas ǵalymdardy aıaǵyna turǵyzatyn qadam. Munda 3 jyldyq baǵdarlamada osy granttyń aıasynda 500 myń teńge kóleminde jalaqy eskerilgen. 2013 jyldan bastap PhD ǵylymı dárejesin qorǵaǵandar osy baǵdarlamaǵa qatysa alady. Keıingi eki jylda 3 konkýrs jarııaladyq. Osy oraıda 881 ǵylymı joba qamtylyp, jas ǵalymdar (granttardy) utyp aldy. Olarǵa qoldaý kórsetilip jatyr. Jyl saıyn osy joba aıasynda myńǵa jýyq granttardy berip, jas ǵalymdardy qoldaý maqsaty qoıyldy», - dedi mınıstr.

Budan buryn habarlanǵandaı, qazirgi kezde elimizde 22 456 ǵylymı kadr bar.

Zertteýshilerdiń 37 paıyzynda (2022 jyly – 35%) ǵylymı jáne akademııalyq dárejesi bar. Sondaı-aq, zertteýshilerdiń 34 paıyzyn - 35 jasqa deıingi jas ǵalymdar, 43 paıyzyn – 35-54 jastaǵylar, 23 paıyzyn 55 jastan asqan ǵalymdar qurap otyr.