PGL Astana 2026 halyqaralyq týrnırin eki kúnde shamamen 16 myń kórermen tamashalady
ASTANA. KAZINFORM – Elordadaǵy Barys Arena kesheninde Counter-Strike 2 boıynsha ótip jatqan PGL Astana 2026 halyqaralyq týrnıriniń ekinshi oıyn kúni aıaqtaldy, dep habarlaıdy qala ákimdiginiń resmı saıty.
Jartylaı fınal kezeńine Astanadaǵy arenada shamamen 9 myń kórermen bas qosty. Al onlaın translıatsııalardyń jalpy aýdıtorııasy 500 myńǵa jýyq kórermenge jetti. Bul týrnırge halyqaralyq qyzyǵýshylyqtyń joǵary ekenin kórsetip, Astananyń álemdik kıbersporttyń mańyzdy alańdarynyń biri retindegi statýsyn nyǵaıta tústi.
16 mamyr kúni kórermender týrnırdiń jartylaı fınaldyq matchtaryn tamashalap, onyń qorytyndysy boıynsha grand-fınalǵa joldama alǵan komandalar anyqtaldy. Alǵashqy jartylaı fınalda eýropalyq Team Spirit ujymy germanııalyq MOUZ komandasyn jeńdi.
Oıyn kúniniń ekinshi matchynda Team Falcons komandasy quramynda qazaqstandyq Moon óner kórsetken MAGIC komandasymen kezdesti. Jergilikti jankúıerlerdiń qyzý qoldaýyna qaramastan, Falcons jeńiske jetip, fınalǵa shyqty. Endi olar sheshýshi kezdesýde Team Spirit-pen baq synasady.
Jankúıerlerdiń aıtýynsha, týrnırdiń ekinshi oıyn kúni tipti áserli bolǵan – trıbýnalar komandalarǵa úzdiksiz qoldaý kórsetti.
– Men PGL týrnıri úshin Astanaǵa alǵash ret kelip turmyn jáne erekshe áser aldym. Arena zamanaýı, jankúıerler komandalardy óte belsendi qoldaıdy. Kıbersporttyń munda joǵary deńgeıde damyp jatqany baıqalady, - dedi sheteldik qonaqtardyń biri.
Týrnır 17 mamyr kúni jalǵasady. Jarystyń sońǵy kúni kórermen halyqaralyq týrnırdiń jeńimpazy anyqtalatyn sheshýshi matchqa kýá bolady.
Aıta keteıik, budan buryn elordadaǵy PGL Astana 2026 týrnıriniń alǵashqy oıyn kúninde 7 myń kórermen kelgenin jazǵan edik.
