PGL Astana 2026: elordadaǵy týrnırge alǵashqy oıyn kúninde 7 myń kórermen keldi
ASTANA. KAZINFORM – Elordada Counter-Strike 2 boıynsha ótip jatqan PGL Astana 2026 halyqaralyq týrnıri sátti bastaldy. Barys Arena kesheninde uıymdastyrylǵan jarystyń alǵashqy oıyn kúnine shamamen 7 myń kórermen jınalyp, elorda turǵyndary men qonaqtarynyń úlken qyzyǵýshylyǵyn týdyrdy, dep habarlaıdy qala ákimdiginiń resmı saıty.
Týrnırdiń jartylaı fınalyna MOUZ, Team Spirit, Magic jáne Falcons komandalary joldama aldy. Alǵashqy kúnniń ózinde kórermender tartysty kezdesýlerdi, áserli oıyn sátterin jáne is-sharanyń joǵary deńgeıde uıymdastyrylǵanyn tamashalady.
Jankúıerlerdiń erekshe nazary qazaqstandyq oıynshylardyń ónerine aýdy.
Arenada qoldaý kórsetý atmosferasy ornap, trıbýnalar súıikti komandalary men kıbersportshylardyń árbir sátti áreketin qyzý qoldap otyrdy.
Týrnır qonaqtarynyń qatarynda Counter-Strike boıynsha álem chempıony Dáýren Qystaýbaev, FURIA Esports komandasynyń oıynshysy Danııl Golýbenko, strımer Slava Býster, PGL týrnırleriniń júrgizýshisi James Banks, sondaı-aq álem chempıony Gabrıel Toledo boldy.
«Barys Arena-daǵy atmosfera keremet boldy. Kıbersport tóńireginde mundaı úlken qyzyǵýshylyqty kópten beri kórmeppin. Trıbýnalarda erekshe energııa sezildi.
Kórermender komandalarǵa qoldaý bildirip, urandap, árbir raýndqa shynaıy jankúıer boldy. Osyndaı týrnırge qatysa alǵanyma qýanyshtymyn», – dedi jankúıerlerdiń biri.
Uıymdastyrýshylar men sarapshylardyń aıtýynsha, mundaı týrnırlerdi ótkizý oqıǵalyq týrızmdi damytýǵa yqpal etip, Astananyń iri halyqaralyq kıbersport jarystaryn qabyldaıtyn alań retindegi mártebesin nyǵaıtady. Sheteldik qonaqtar jarystyń joǵary deńgeıde uıymdastyrylǵanyn, elordanyń zamanaýı ınfraqurylymyn jáne Qazaqstan jastarynyń kıbersportqa qyzyǵýshylyǵy artyp kele jatqanyn atap ótti.
Búgin, 16 mamyrda týrnır ekinshi oıyn kúniniń matchtarymen jalǵasady. Jankúıerler aldynda myqty komandalardyń jańa kezdesýleri ótedi.
Eske sala keteıik, buǵan deıin elordada PGL Astana 2026 halyqaralyq týrnıri bastalǵanyn jazǵanbyz.
