«Pfizer vaktsınasynyń synaǵyna qatysqan júkti áıelder túsik tastady» - feık
Málim etilgendeı, bul aqparat osy jyldyń 19 qańtarynda ınternettiń aǵylshyntildi segmentinde jarııalanǵan maqalaǵa negizdelgen.
Onda 270 qatysýshynyń 238-i belgisiz sebeptermen synaqtan shyǵyp ketkeni, al qalǵan 32-niń bireýi ǵana saý balany dúnıege ákelgeni aıtylǵan. Bul málimetterdi avtor Pfizer-BioNTech-tiń «5.3.6 2021 jylǵy 28 aqpanǵa deıin alynǵan PF-07302048 (bnt162b2) jaǵymsyz qubylystar týraly tirkeýden keıingi habarlamalarǵa jıyntyq taldaý» qujatynan alǵan.
Reuters portalynyń faktchekerleri Tehas ýnıversıtetiniń ońtústik-batys medıtsınalyq ortalyǵyndaǵy Ana men bala medıtsınasy kafedrasynyń dotsenti Emılı Adhıkarımen suhbattasqan. Á.Adhıkarı Pfizer-BioNTech-tiń túpnusqa qujatymen tanysyp, 238 qatysýshynyń synaqtan shyǵyp qalmaǵanyn, tek qursaqtaǵy balalary áli de dúnıege kelmegenin túsindirdi. Bolashaq analardyń klınıkalyq synaqtar kezinde júktiliktiń nátıjesi týraly aıta almaý sebebi osy.
Sondaı-aq London Imperatorlyq kolledjiniń reprodýktıvti ımmýnologııa pániniń oqytýshysy Vıkkı Male Reuters agenttigine aıtýynsha, maqalada aıtylǵan jaǵymsyz áserler vaktsınalarmen baılanysty bolmaýy múmkin. Onyń sózinshe, maqalada sıpattalǵan oqıǵalar vaktsınatsııadan keıin bolǵan, biraq olardy egýdiń saldary dep aıtýǵa negiz joq. Sondaı-aq V.Male maqalada vaktsınalanǵan áıelder arasynda 205 túsik tastaý jaǵdaıy týraly aıtylǵanyn, alaıda, bul AQSh-ta vaktsınalanǵan júkti jáne bala emizetin áıelderdiń az ǵana bóligin quraıtynyn atap ótti.
«Júkti áıelder men bala emizetin analardy COVID-19 qarsy vaktsınatsııalaýdy bastamas buryn preparattar tolyq klınıkalyq jáne klınıkaǵa deıingi zertteýlerden ótti. Búgingi tańda bul protsedýra qaýipsiz jáne merziminen buryn bosaný nemese uryqtyń ólý qaýpin arttyrmaıdy dep aıtýǵa ǵylymı negiz jetkilikti.
Demek, Pfizer vaktsınasynyń klınıkalyq zertteýleriniń barlyq qatysýshylary túsik tastady degen aqparat – feık jáne manıpýlıatsııa», - dep qorytyndylaıdy Stopfake.kz saıty.
