Pfizer vaktsınasyn satyp alý quny nelikten qupııa - mınıstr túsindirdi

NUR-SULTAN. QazAqparat – Qazaqstan satyp alatyn Pfizer vaktsınasynyń qunyn óndirýshi kompanııa jarııa etýge ruqsat bermedi. Bul týraly QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Buǵan deıin aıtqanymdaı, qazan men qarasha aıynda kútip otyrmyz. Barlyǵy Pfizer kompanııasynyń jetkilizimine baılanysty. Baǵasyna qatysty aıtar bolsam, qazirgi ýaqytta Pfizer kompanııasynan málimetterdi jarııa etpeý týraly hat aldyq. Sondyqtan da bul másele boıynsha Pfizer kompanııasyna júginý qajet. Eger olar derekterdi jarııa etýge ruqsat berse, onda jarııa etemiz. Olaı bolmaǵan jaǵdaıda, kelisimshart sharty buzylyp, vaktsınany jetkizý merzimi de saqtalmaýy múmkin. Sondyqtan kez kelgen kompanııamen jumys barysynda kelisimshartty saqtaýǵa tıispiz», - dedi mınıstr.

Alekseı Tsoıdyń aıtýynsha, Pfizer kompanııasy Qazaqstan vaktsınany qansha somaǵa satyp alatyndyǵyn jarııalaýǵa ruqsat bermeı otyr.

«Biz jeke suranys ta jiberdik. Ony jarııa etkimiz de kelgen. Biraq, qazirgi ýaqytta kompanııa bizge bulaı jasaýǵa tyıym salyp otyr. Kompanııa bul máseleni taǵy qarastyrady dep oılaımyz. Búgin málimetterdi jarııa etýge qatysty taǵy da kelissóz júrgizdik. Degenmen, qazirgi ýaqytta bizde shekteý tur. Sondyqtan qalaı múmkindik týyndaıdy, birden jarııa etemiz. Jalpy, ózge elderdegi baǵamen birdeı. Bul, kompanııanyń baǵa saıasaty»,- dedi Alekseı Tsoı.