«Pfizer» delegatsııasy Qazaqstanǵa keldi

ASTANA. QazAqparat - Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Eýropa, Azııa jáne Afrıka boıynsha óńirlik dırektory Ozgýr ıAzııýrt bastaǵan «Pfizer» delegatsııasymen kelissózder júrgizdi. Bul týraly QazAqparat SІM silteme jasap habarlaıdy.

Kelissóz ótken jyly qyrkúıekte Qazaqstan Prezıdenti Qasym-Jomart Toqaevtyń Nıý-Iorkke jasaǵan sapary barysynda «Pfizer» kompanııasymen qol qoıylǵan yntymaqtastyq týraly memorandýmǵa sáıkes júrgizildi.

Kezdesýge QR Densaýlyq saqtaý mınıstri Ajar Ǵınııat jáne «SK-Farmatsııa» JShS Basqarma tóraǵasy Renat Esqalıev qatysty.

Kelissózder barysynda Qazaqstanda amerıkandyq kompanııanyń bolýyn keńeıtýdiń ózekti máseleleri, onyń ishinde «Prevenar-13» pnevmokokkty vaktsınanyń kelisimsharttyq óndirisin oqshaýlaý talqylandy. Amerıkandyq tarap qazaqstandyq naryqqa bıofarmatsevtıkalyq transulttyq kompanııalardy tartý úshin jergilikti zańnamany jetildirý jónindegi kúsh-jiger týraly habardar etildi. Óz kezeginde «Pfizer» basshylyǵy farmatsevtıkalyq qyzmetti retteıtin QR normatıvtik-quqyqtyq aktilerindegi ózgeristerdi oń baǵalady.

Shtab-páteri Nıý-Iork qalasynda ornalasqan «Pfizer» amerıkandyq transulttyq kompanııasy – bıofarmatsevtıkalyq naryqtyń álemdik kóshbasshylarynyń biri. Kompanııanyń negizgi zertteý ortalyǵy Konnektıkýt shtatyndaǵy Groton qalasynda ornalasqan.

Búginde kompanııa júrek-qantamyr júıesi, tirek-qımyl apparaty aýrýlaryna qarsy dári-dármekterdi jasaýmen aınalysady, antıbıotıkter, vıagra, ımmýnodepressanttar jáne t.b. shyǵarady. 2020 jyly «BioNTech», «Pfizer» men «Fosun Pharma» kompanııalary koronavırýsqa qarsy vaktsına ázirledi.

Foto: QR Syrtqy ister mınıstrligi baspasóz qyzmeti