Pezeshkıannyń Qazaqstanǵa sapary Iran úshin bıylǵy eń mańyzdy oqıǵanyń biri — saıasattanýshy
ASTANA. KAZINFORM — Qazaqstanǵa sapar Irannyń syrtqy saıasatty ártaraptandyrýǵa jáne ózge memlekettermen baılanys ornatýǵa tyrysatynyn kórsetedi. Bul týraly túrik-german ýnıversıtetiniń doktory, saıasattanýshy Zaýr Gasımov aıtty.
AnewZ portalyna bergen suhbatynda túrik-german ýnıversıtetiniń doktory, saıasattanýshy Zaýr Gasımov Irannyń qazir nege Qazaqstanǵa kóńil aýdaryp otyrǵanyn, aımaqtaǵy jaǵdaı qalaı ózgerip jatqanyn jáne Tegerannyń nege syrtqy saıasatty ártaraptandyrýǵa tyrysatynyn túsindirdi.
Onyń sózinshe, prezıdent Pezeshkıannyń Qazaqstanǵa sapary – Iran úshin osy jyldaǵy eń mańyzdy dıplomatııalyq oqıǵalardyń biri.
— Nege bul sapar qazir osynshalyqty strategııalyq mánge ıe? Men Iran men Ortalyq Azııa arasyndaǵy qatynastarda qandaı da bir serpilis boldy dep aıtpas edim. Ótken jyly kórgenimizdeı, Qazaqstan — óńirdegi eń myqty ekonomıkalyq memleket bolsa da — Iranmen qaýipsizdik nemese basqa salalarda belsendi túrde jumys istemegen. Iran Ózbekstanmen jáne tili jaqyn Tájikstanmen áldeqaıda tyǵyz baılanysta boldy. Biraq Qazaqstanǵa sapar Irannyń syrtqy saıasatty ártúrli eldermen júrgizýge jáne tıimdi memlekettermen baılanys ornatýǵa tyrysatynyn kórsetedi. Bul el qazirgi tańda mańyzdy ekonomıkalyq jáne saıası oqshaýlanýdyń jaǵdaıynda, sonyń kesirinen aýyr qarjylyq jáne ekologııalyq daǵdarysty bastan keshirip jatyr. Sondyqtan Qazaqstanmen yntymaqtastyq Kavkaz aımaǵyndaǵy geosaıası dınamıka turǵysynan da erekshe mánge ıe bolyp otyr, — dedi sarapshy.
Budan buryn habarlanǵandaı, Masýd Pezeshkıan 10-11 jeltoqsan kúnderi Astanaǵa resmı saparmen keletini belgili boldy.
Búgin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy aldy.
Buǵan deıin Kazinform-nyń analıtıkalyq sholýshysy Astana men Tegeran arasyndaǵy kelissózdiń astaryna úńilip kórgen edi.