Pezeshkıan Iranda reforma júrgizýge daıyn ekenin málimdedi

ASTANA. KAZINFORM – Iran úkimeti zańdy narazylyqtar men tártipsizdikterdiń aıyrmashylyǵyn anyqtaıdy jáne ózgeris engizýge daıyn. Bul týraly Islam Respýblıkasynyń prezıdenti Masýd Pezeshkıan halyqqa arnaǵan úndeýinde málimdedi, dep habarlaıdy TASS agenttigi.

– Biz halyqtyń daýysyn tyńdaýǵa daıynbyz jáne ekonomıkalyq reformalardy jalǵastyrýǵa bel býdyq, - dep atap ótti saıasatker Al Mayadeen telearnasynan kórsetilgen úndeýinde. – Biz ırandyqtardy óz talabyn anyq bildirý úshin kóshege shyǵýǵa jáne tártipsizdikterdi órshitetinderdiń qazirgi narazylyq sebebin burmalaýyna jol bermeýge shaqyramyz.

Pezeshkıan demonstranttar ekonomıkalyq jaǵdaıdyń nasharlaýyna narazylyq bildirip jatqanyn, biraq olar naryqty órtep nemese qylmystyq áreket jasap jatpaǵanyn málimdedi.

– Irandaǵy tártipsizdikterdi Amerıka men Izraıl uıymdastyryp jatyr. Olar óz agentterine jaǵdaıdy turaqsyzdandyrýdy buıyrady, - dep atap ótti ol.

2025 jyldyń 29 jeltoqsanynda Iran rıalynyń kúrt tómendeýine baılanysty Tegeranda saýdagerler narazylyq bildire bastady. 30 jeltoqsanda stýdentter tártipsizdikke qosyldy. Tártipsizdik kóptegen iri qalalarǵa tarady. 2 qańtarda kóshelerde belgisiz qarýly adamdar toby paıda boldy, al tártipsizdikke qatysýshylar men quqyq qorǵaý organdary arasyndaǵy qarýly qaqtyǵys kúsheıe tústi.

Jappaı tártipsizdik 8 qańtardyń keshinde sharyqtaý shegine jetti. Bılik 25 quqyq qorǵaý organy qyzmetkeriniń qaza tapqanyn habarlady. Tegeran meri Alıreza Zakanı tártipsizdik astanada 25 meshitti órtep, 26 bankke, úsh medıtsınalyq ortalyqqa, 10 úkimettik mekemege, 48 órt sóndirý kóligine, 42 avtobýs pen jedel járdem kóligine jáne 24 páterge zııan keltirgenin habarlady.

Iran bıligi tártipsizdik jasaýshylardy terrorıster dep atap. Muny uıymdastyrdy dep Izraıl men Amerıka Qurama Shtattaryn kinálady.

Eske sala keteıik, 10 qańtarda Donald Tramp Iran úkimetine qarsy úsh jyldaǵy eń iri jappaı narazylyqqa qatysty pikir bildirip, Amerıka Qurama Shtattary narazylyq bildirýshilerge kómektesýge daıyn ekenin málimdedi.

11 qańtarda Iran parlamentiniń spıkeri Mohammad Bager Galıbaf AQSh elge shabýyl jasasa, amerıkalyq áskerler men Izraıl «zańdy nysana» bolatynyn eskertti.

Irannyń Ulttyq polıtsııasynyń bastyǵy Ahmad-Reza Radan bılik tártipsizdikke negizgi qatysýshylar dep sanaıtyn adamdardy tutqyndaǵanyn málimdedi.