Pezeshkıan: Eki el kásipkerleri birqatar perspektıvti baǵyt boıynsha yntymaqtastyq ornatty
ASTANA. KAZINFORM — Iran Prezıdenti bıznes forým barysynda saýda-ekonomıkalyq seriktestiktiń perspektıvti salalaryna toqtaldy. Bul týraly Aqordanyń baspasóz qyzmeti málimdedi.
Masýd Pezeshkıan bul kezdesý qos halyqtyń ǵasyrlardan tamyr tartatyn dostyǵynyń kórinisi ǵana emes, áleýmettik-ekonomıkalyq qarym-qatynasyn damytý jolyndaǵy mańyzdy qadam ekenin aıtty.
— Eki el kásipkerleri birqatar perspektıvti baǵyttar boıynsha yntymaqtastyq ornatty. Atap aıtqanda, Iran — Qazaqstan birlesken keme qatynasyn jolǵa qoıýǵa, Kaspıı teńizinde konsortsıým qurýǵa, Aqtaý portynda aýyl sharýashylyǵy ónimderine arnalǵan qoımalar men taratý ortalyǵyn ashýǵa, Qazaqstanda taǵam ónimderin jáne qaǵaz qaptamalaryn shyǵaratyn birlesken zaýyt ashýǵa, Almatyda ırandyq qurylys materıaldarynyń eksporttyq parkin jasaqtaýǵa ýaǵdalasty. Sondaı-aq mıneralogııa, shıkizatty óńdeý jáne aımaqtyq eksportty órkendetý salalarynda yqpaldastyq ornattyq. Biz Iran — Qazaqstan birlesken saýda keńesiniń qurylýyn, tikeleı áýe reısterin damytýdy, kásipkerlerge vıza rejımin jeńildetýdi, eki eldiń saýda kórmelerin turaqty túrde uıymdastyrýdy qoldaımyz, — dedi Masýd Pezeshkıan.
Budan buryn bıznes forým aıasynda Kazakh Invest ulttyq kompanııasy yntymaqtastyq týraly eki kelisimge qol qoıýdy josparlap otyrǵanyn habarlady.