Pezeshkıan AQSh-tyń Iranǵa shabýylyn jahandyq tártipke tóngen qaýip dep atady
ASTANA. KAZINFORM - Iran prezıdenti Masýd Pezeshkıan AQSh-tyń Iranǵa jasaǵan shabýyldary men eldiń joǵarǵy kóshbasshysy Álı Hameneıge baǵyttalǵan áreketterin jahandyq quqyqtyq tártipti buzýy múmkin jańa úderis dep baǵalady, dep habarlaıdy Anadoly.
Onyń aıtýynsha, mundaı jaǵdaı toqtatylmasa, saldary kóptegen elderge áser etýi yqtımal.
Amerıkalyq X áleýmettik jelisinde jarııalaǵan málimdemesinde Pezeshkıan «Izraıl rejıminiń tabıǵaty memlekettik terrorızmge negizdelgenin» aıtty. Ol AQSh-tyń Iranǵa qarsy áreketteri men Álı Hameneıge jasalǵan qastandyq áreketteri halyqaralyq qaqtyǵystardaǵy quqyqtyq normalardy álsiretetin jańa kezeńniń bastamasy ekenin atap ótti.
- Eger álem bul daǵdarysqa batyl túrde qarsy turmasa, onyń oty kópshilikti sharpıdy, — dedi Iran prezıdenti.
AQSh pen Izraıldiń Iranǵa shabýyldary
Izraıl men AQSh 28 aqpanda Tegeran men Vashıngton arasyndaǵy kelissózder jalǵasyp jatqan kezde Iranǵa áskerı soqqy jasady.
Óz kezeginde Iran jaýap retinde aımaqtaǵy birqatar nysanaǵa soqqy berdi. Olardyń qatarynda Izraıl, sondaı-aq amerıkalyq áskerı bazalar ornalasqan Qatar, Birikken Arab Ámirlikteri jáne Bahreın bar.
Shabýyldar saldarynan Irannyń joǵarǵy kóshbasshysy Álı Hameneı jáne birqatar joǵary laýazymdy tulǵalar qaza tapqany habarlandy.
Osyǵan deıin Iran Izraıl men AQSh nysandaryna soqqy jasalǵanyn málimdegen bolatyn.
