Peugeot sıgnal júıesindegi aqaýǵa baılanysty 600 myń kólikti keri qaıtaryp jatyr
ASTANA. KAZINFORM — Peugeot frantsýz avtokontserni búkil álem boıynsha 600 myńnan astam Peugeot 208 kóligin keri qaıtaryp jatyr. Bul sheshim dybys sıgnalyndaǵy (klaksonyna) aqaýǵa baılanysty qabyldanǵan. Keıbir kólikterdegi sıgnaldyń dybysy jetkilikti deńgeıde qatty emes bolyp shyqqan jáne ol qaýipsizdik talaptaryna saı kelmeıdi.
Peugeot kompanııasy aqaýy bar dybys sıgnalyn tolyq jumys isteıtin jáne qattyraq estiletin jańa qondyrǵyǵa aýystyratynyn málimdedi. Óndirýshi bul másele tek dybys sıgnalyna qatysty ekenin, al avtomobıldiń basqa bólshekteri men baǵdarlamalyq júıesine áser etpeıtinin naqtylady.
Speedme basylymynyń málimetinshe, Germanııada ǵana shamamen 35 myń kólik keri shaqyrtýǵa ilikken. Olar 2019 jyldyń 1 qyrkúıegi men 2022 jyldyń 25 shildesi aralyǵynda shyǵarylǵan.
Kólik ıelerine tikeleı habarlama jiberiledi. Sonymen qatar olar resmı dılerlerge nemese avtorızatsııalanǵan servıs ortalyqtaryna óz erkimen baryp, jóndeý jumystaryn júrgize alady.
Qyzmet kórsetý merzimi servıs ortalyqtarynyń júktemesine baılanysty bolady, biraq dybys sıgnalyn aýystyrý ádette kóp ýaqyt almaıdy.
Aıta keteıik, Ford Motor Company artqy kórinis kamerasynyń beınesin kórsetýge qatysty aqaýlarǵa baılanysty shamamen 1,74 mln avtokólikti keri qaıtarý boıynsha eki naýqan bastalǵanyn habarlady.
