Peugeot kompanııasy 2017 jyly Qazaqstannyń avtomobıl narǵyndaǵy úlesin 5 paıyzǵa jetkizbek
ALMATY. 27 qyrkúıek. QazAqparat - Almatyda Qostanaı qalasyndaǵy «AgromashHoldıng» zaýytynda jınalǵan alǵashqy Peugeot avtokólikteriniń tusaýkeseri ótti.
Kompanııa óz tutynýshylaryna Qazaqstanda shyǵarylǵan Peugeot 301, Peugeot 3008, Peugeot 508, Peugeot Partner úlgilerimen qatar Reseıdiń Kalýga qalasynda PSA Peugeot Citroën zaýytynda tolyq tsıkl rejıminde shyǵarylatyn Peugeot 408 modelin usynýda. Qazaqstandaǵy óndiristik qyzmet AllurGroup tobyna enetin «AgromashHoldıng» AQ-men áriptestik aıasynda damýda.
«Jobanyń bastapqy kezeńinde Peugeot avtokólikteriniń shyǵarylý kólemi jylyna 4 myń birlikti quraıtyn bolady. Biz naryqtaǵy úlesimizdi birtindep nyǵaıtyp, 2017 jyly ony 5 paıyzǵa jetkizýdi josparlap otyrmyz. Ónerkásiptik jáne kommertsııalyq operatsııalardy biriktirip otyrǵan bul joba Qazaqstannyń ulttyq avtoındýstrııasynyń damýyna jáne Peugeot belgisiniń kommertsııalyq jetistikke qol jetkizýine yqpal etetin bolady», - deıdi Peugeot Qazaqstan kompanııasynyń bas dırektory Klod Koeslıe.
AllurGroup Avtokóliktik kompanııalar tobynyń prezıdentiAndreı Lavrentevtiń aıtýynsha, búginde qazaqstandyqtardyń Peugeot avtokólikterin Qazaqstandaǵy osy saýda belgisiniń resmı dılerlerinen satyp alý múmkindigi paıda boldy. Jobanyń bul kezeńinde elimizdiń basty óńirlerinde, atap aıtqanda Almaty, Astana, Qaraǵandy jáne Qostanaı qalalarynda 4 Peugeot avtoortalyǵy ashylýda. Kelesi jyly olar naryqtyq qamtýdy 65 paıyzǵa deıin arttyrý úshin taǵy tórt ortalyq ashýdy josparlap otyr. Óıtkeni naryq birtindep ózgerýde. Qazaqstanda shyǵarylǵan avtokólikterge degen suranys birtindep artyp keledi. Elimizde óndiriletin jańa brendterdiń áleýeti óte zor. Peugeot AllurAuto jobasynyń jetekshisi Andreı Pavlıkovtyń sózine qaraǵanda, turaqty ekonomıkalyq ósý jaǵdaıynda qazaqstandyq avtokólik naryǵy qarqyndy túrde damyp keledi. 2011 jyly elimizde 45 myń, 2012 jyly 98 myń jańa jeńil jáne kommertsııalyq avtokólik satyldy. Boljamdar boıynsha naryqtyń kólemi 2017 jyly 300 myń birlikke jetetin bolady.
