«Petıa jáne qasqyr» sımfonııalyq ertegisiniń keıipkerleri qazaqsha sóıleıdi
ASTANA. 6 qańtar. QazAqparat - 7-9 qańtarda qysqy demalys kezinde «Astana Opera» teatrynyń kameralyq zalynda elorda oqýshylaryna kemeńger kompozıtor Sergeı Prokofevtiń balalarǵa arnalǵan «Petıa jáne qasqyr» atty áıgili sımfonııalyq ertegisi qoıylady.
Bul týraly astana.kz saıty teatrdyń baspasóz qyzmetine silteme jasap habarlaıdy.
«Petıa jáne qasqyr» ertegisi sımfonııalyq orkestrdiń súıemeldeýimen óleńdi mánerlep oqýǵa arnalǵan. Týyndynyń negizgi ıdeıasy erteginiń árbir keıipkerin óz aspaby jáne óz mýzykalyq taqyryby kórkemdeıtindiginde jatyr. «Petıa jáne qasqyr» sımfonııalyq ertegisi álemdegi eń kóp oryndalatyn mýzykalyq týyndylardyń biri.
Atalǵan jobanyń basty jańalyǵy - «Petıa jáne qasqyr» ertegisi alǵash ret qazaqshaǵa aýdarylyp otyr. Aýdarma avtory - Jolaman Tursynbaev. Endi oqýshylar sımfonııalyq ertegini eki tilde: qazaqsha jáne oryssha tyńdaı alady.
Ertegini «Astana Operanyń» shaǵyn sımfonııalyq orkestri oryndaıdy, mátindi oqıtyndar: Tólegen Nazarbekov, Sáýle Máýletova, Marjan Jákenova. Spektakl dırıjerlary - Rýslan Baımurzın, Raqymjan Baspaev.
Mýzykatanýshy Marjan Jákenova, balalardyń boıynda klassıkalyq mýzykaǵa degen mahabbatty dál osy «Petıa jáne qasqyr» sııaqty shyǵarmalar arqyly sińirý kerek dep esepteıdi, óıtkeni bul mýzyka óneriniń naǵyz jaýhary bolyp tabylady ári balalarǵa túsinikti.
