Petropavlǵa jańa avtobýstardyń alǵashqy legi keldi
PETROPAVL. QazAqparat – Petropavlǵa jańa avtobýstardyń beseýi jetti.Jalpy qala kóshelerine bıyl osyndaı 100 qoǵamdyq kólik alynbaq, dep habarlaıdy QazAqparat tilshisi.
Petropavl kóshelerine jańa avtobýstar shyǵady. Olardyń úsheýi oblys ortalyǵyna keshe jetkizilse, ekeýi búgin zaýyttan jolǵa shyǵady.
«Petropavlǵa 100 avtobýs alamyz. Qańtardyń basynda testileýden ótkizý úshin jeteýi jetkizildi. Alaıda olar tolyq jabdyqtalmaǵan bolyp shyqty.
Avtobýstar qala kósheleriniń eni men júktemesine saı jasalǵan. Júz avtobýstyń 60-y 8 metrlik, qalǵany 10 metrlik. Olar eń aldymen turǵyndarǵa yńǵaıly bolady. Aýa baptaǵysh, elektrondy eseptegishter, beınekameralar ornatylǵan. Іshi jazda salqyn, qysta jyly bolady», - deıdi óńir basshysy Qumar Aqsaqalov.
Yotong markali bul kólikter dızel otynymen júredi. Qazaqstanda qurastyrylǵan kólikter Petropavlǵa lek-legimen jyl sońyna deıin jetkizilmek.
Óńir basshysynyń aıtýynsha, jańa qoǵamdyq kólikterdiń kelýimen jol júrý tarıfi ózgermeıdi. Bul maqsatqa bıýdjetten sýbsıdııa qarastyrylǵan.
Eske sala ketsek, buǵan deıin petropavldyqtardyń keı sanaty qalaishilik avtobýstarda tegin júretini aıtylǵan bolatyn.
