Petropavlǵa taza sý berilip jatyr, jalǵan aqparat taratýshylar jaýapqa tartylady – Serik Muhamedıev

PETROPAVL. KAZINFORM – Petropavlda jergilikti bılik balama sý kózin qosyp, turǵyndardy sýmen qamtý máselesin eki kún ishinde sheshti. Biraq búgin áleýmettik jelide sýmen qamtýshy kásiporyndy sý basqandyǵy týraly vıdeo tarap, halyqty tez arada sý qoryn jasaýǵa shaqyrǵan aýdıojazba chattan chatqa kóshti.

Petropavl qalasynyń ákimi bul jazbalardyń jalǵan ekendigin habarlap, jurtty qaýesetke ermeýge shaqyrdy. 

«Keshe keshke úılerge sý berildi. Búgin tańerteń sorǵy stantsııasyn sý basqandyǵy týraly jalǵan aqparat tarap, sý qoryn jınaýǵa shaqyrǵan habarlama tarady. Sonyń saldarynan búkil qala turǵyndary sý alýǵa kirisip, sýdyń qysymy túsip ketti. Al taraǵan beınejazbanyń «Qyzyljar sý» kásipornyna qatysy joq. Qala turǵyndary, qaıtalaımyn – taraǵan aqparat jalǵan. Biz óz árekettimizben ádettegi jumys rejımin buzyp, sý qysymyn jasandy túrde tómendetip jiberdik. Jalǵan aqparat taratýshylar! Petropavlda qazir óte qıyn jaǵdaı, adamdar alańdap otyr, sizder feık taratý arqyly dúrbeleń týdyryp otyrsyzdar. Bul beıne-aýdıo jazbalardyń barlyǵy avtorlar men taratýshylardy jaýapkershilikke tartý úshin quqyq qorǵaý organdaryna jiberildi», - dedi Serik Muhamedıev.

Qala ákiminiń aıtýynsha, qazir sý qysymy qalpyna keledi. Jasandy túrde dúrbeleń týdyrǵan kináliler jazalanady.

Buǵan deıin Petropavlda jalǵan aqparat taratqan 20 jastaǵy jigittiń jaýapqa tartylǵandyǵyn aıtqan edik.