Petropavlǵa sý tasqynynyń úshinshi tolqyny kele jatyr

PETROPAVL. KAZINFORM — Soltústik Qazaqstan oblysy Sergeev sý qoımasynda sý tasqynynyń úshinshi tolqyny sharyqtaý sheginen ótti.

Gıdrologııalyq bekette sý deńgeıi birtindep túse bastady.

«Qazgıdromet» RMK SQO fılıalynyń málimetinshe, bul nysanda tasqynnyń sharyqtaý shegi 20 sáýirde ótti. Sý qoımasyndaǵy bógettiń jotasynan asyp tógilý bıiktigi 262 sm jetti. Ótken bir táýlikte ol 7 sm tústi. Qazir bógen 147% tolǵan.

Esil ózeni ótetin Shóptikól, Toqsan bı, Kreşenka eldi mekenderiniń mańynda da sý deńgeıi túsip jatyr, búginde aýyldarǵa keletin qaýip jaq.

Sergeevka eldi mekeninen tómen Esil boıynda ornalasqan aýyldarda ázirge sý deńgeıiniń kóterilýi baıqalady. Máselen Pokrovka eldi mekeninde qaýipti deńgeı 950 sm bolsa, qazir munda 1262 sm jetti. Bir táýlikte 10 sm artty.

Novonıkolskoe eldi mekeninde de qaýipti deńgeı 1534 sm asyp ketti, qazir 1540 sm, bir táýlikte 36 sm kóterildi.

Petropavlǵa da sý kelip jatyr. Qaýipti deńgeı 960 sm bolsa, qazir 1063 sm jetti, ótken táýlikte 1 metrge ózgergen.

Esil ózeni ótetin óńirdegi sońǵy núkte — Dolmatovo aýylynyń mańynda bir táýlikte deńgeıi 5 sm artyp, 1283 sm jetti. Qaýipti deńgeıge deıin áli shamamen 1,5 metr bar.

Esterińizge salaıyq, Petropavlda Esil ózeniniń tasýyna baılanysty Zarechnyı kentine kirýge ýaqytsha shekteý qoıylǵanyn jazǵan edik.