Petropavlǵa saıahattap kelgen aýstrııalyq azamat adasyp, stadıonda túnemek bolǵan

PETROPAVL. KAZINFORM – Polıtseıler «Dınamo» stadıonynda túnemek bolǵan er adamdy baıqaǵan.

Soltústik Qazaqstan oblysy polıtsııa departamenti baspasóz qyzmetiniń málimetinshe, 46 jastaǵy aýstrııalyq saıahatshy oblys ortalyǵyna kelip, adasyp ketken. 

SQO PD kóshi-qon qyzmeti basqarmasynyń qyzmetkerleri Aaron Arıanyń shyn máninde elge zańdy negizde kelgenine kóz jetkizdi. Ol Astanaǵa Túrkııadan ushyp kelip, Petropavlǵa jol-jónekeı ketip bara jatqan kóliktermen jetken. Tártip saqshylary ony qonaqúıge ornalastyrdy.

Aaron Arıanyń álemdi aralap, elderge saıahattap júrgenine birneshe jyl bolǵan. Ony aýyldyq jerdiń tynys-tirshiligi qyzyqtyrady eken. Sol úshin qazirgi ýaqytta Ortalyq Azııa elderimen tanysýdy josparlap, jolǵa shyqqan. 

Ol Qazaqstanǵa alǵash ret kelip otyr. Polıtsııanyń kórsetken kómegine rıza bolǵan ol ertesine qaıtadan jolǵa shyǵyp, saparyn jalǵady. 

Buǵan deıin Petropavlda sý tasqynyna qarsy jumys barysynda elýge jýyq myltyq uńǵysy tabylǵanyn jazǵan edik.