Petropavlǵa mol sý kelýine baılanysty evakýatsııa pýnkteriniń sany artty
PETROPAVL. KAZINFORM — Petropavlda Zarechnyı kentinde № 13 mektepte ornalasqan evakýatsııalyq pýnkt tasqyn sýǵa baılanysty kóshirildi. Sondaı-aq bilim mekemelerinde turǵyndarǵa qosymsha oryndar ázirlenip jatyr.
Petropavl qalalyq ákimdiginiń málimetinshe, Zarechnyı kentindegi evakopýnkt № 2 orta mektepke kóshirildi.
Úılerinen kóshirilgen turǵyndar úshin Safýan Shaımerdenov atyndaǵy qalalyq klassıkalyq gımnazııada da jatyn oryndar ázirlendi.
Budan bólek Petropavldaǵy Nazarbaev, 247 mekenjaıynda ornalasqan № 4 orta mektepte, Kalıýjnaıa, 22 mekenjaıyndaǵy № 14 mektepte, Ryjov, 51 mekenjaıynda ornalasqan № 12 mektepte, kásibı-pedagogıkalyq kolledjde jáne joǵary qurylys-ekonomıkalyq kolledjde evakýatsııalyq pýnkter ornalasqan.
Soltústik Qazaqstan oblystyq bilim basqarmasynyń málimetinshe, Qyzyljar aýdany Bogolıýbovo orta mektebindegi № 14 evakýatsııalyq pýnktke Bogolıýbovo jáne Nadejka eldi mekenderiniń turǵyndary ornalastyryla bastady.
Tek búgin 40 jatyn orny bar ortalyqqa 30 adam, onyń ishinde 13 bala jetkizildi.
«Turǵyndarǵa mektepterde ornalasqan evakýatsııalyq pýnkterde jaǵdaı jasalǵan. Bogolıýbovo orta mektebinde turǵyndarǵa mektep ashanasyn jalǵa alǵan kásipker úsh mezgil tamaq berip jatyr. Muǵalimder táýlik boıy kezekshilik atqarady», — deıdi departamenttiń baspasóz hatshysy Ásel Orazbaeva.
Petropavlda búginnen bastap Esil ózeni tasyp jatyr.
Al elektr baǵandaryn tasqyn sýdyń qulatýyna baılanysty oblys ortalyǵynda sý berý toqtatyldy.
Petropavl ákimi qalany sýmen qamtý 4 saǵat ishinde qalpyna keletinin habarlady.
