Petropavlǵa Londonnan arnaıy reıspen 95 qazaqstandyq ushyp keldi
PETROPAVL. QazAqparat – Petropavl halyqaralyq áýejaıy «Air Astana» áýe kompanııasynyń Londonnan kelgen arnaıy reısin qarsy aldy, dep habarlaıdy QazAqparat tilshisi.
SQO ákimdigi ishki saıasat basqarmasynyń málimetinshe, ushaqpen 95 qazaqstandyq keldi. Olar ár túrli jaǵdaıǵa baılanysty shetelde bolǵan elimizdiń 13 qalasynyń turǵyndary.
Reısti mamandar asqan qaýipsizdik sharalaryn saqtaı otyryp qarsy aldy. Bekitilgen algorıtmge saı barlyq qyzmetterdiń is-qımyly úılestirildi. Sanıtarlyq-epıdemıologııalyq qaýipsizdik sharalary saqtaldy, ıaǵnı áýejaı aýmaǵy, júk qoıatyn jáne ornalastyrý aımaqtary dezınfektsııalandy.
Ushaq jolaýshylary men ekıpaj múshelerin ákimdik jáne polıtsııa qyzmetkerleri arnaıy baǵyt boıynsha aldyn ala daıyndalǵan meımanhanaǵa jetkizdi. Mamandardyń aıtýynsha, kelýshilerge bar jaǵdaı jasalǵan.
«Jolaýshylardy jáne ekıpaj múshelerin Petropavldaǵy kóp adam qabyldaı alatyn úlken meımanhanalardyń birine ornalastyrdyq. Meımanhanada barlyq sanıtarlyq-epıdemıologııalyq talaptar saqtaldy. Kelgender eki táýlikke oqshaýlandyryldy. Bul jerde olar COVID-19 vırýsyna alynǵan zerthanalyq taldaý qorytyndysyn kútedi. Nátıjesin alǵannan keıin turǵylyqty jerlerine, úı karantıninde otyrý úshin attandyrylady», - delingen baspasóz habarlamasynda.
SQO ákiminiń orynbasary Rýslan Álishev buǵan deıin osy jaǵdaıǵa baılanysty óńir turǵyndarynyń alańdaýyna negiz joqtyǵyn aıtqan edi.
