Petropavlǵa kúkirtsýtek ıisi taramas úshin ne isteý kerek
PETROPAVL. KAZINFORM — Petropavldaǵy ekologııalyq máselelerdiń biri — aýanyń kúkirtsýtegimen lastanýy. Bul ıistiń negizgi kózi — qalanyń aǵyndy sýy jınalǵan «Bıotoǵan».
Qalanyń kárizdik tazartý qurylystaryna (KOS) kelip quıylatyn sarqyndy sý osy «Bıotoǵanda» jınaqtalady. Ol qazir «Qyzyljar sý» JShS-niń balansynda tur.
Kúkirtsýtek — organıkalyq zattar shirigen kezde túziletin ýly gaz. Kóktem men jazda qolqany qabatyn osy jaman ıis Petropavlǵa tarap, turǵyndarǵa jaısyzdyq týdyryp keledi.
Ekologııa jáne tabıǵı resýrstar mınıstrligi Kazinform tilshisiniń osy máselege qatysty suraýyna jaýap berdi.
— Petropavlǵa kúkirtsýtektiń taralýynyń birneshe sebebi bar, olar — kárizdik tazartý qurylystaryna kelip quıylatyn aǵyndy sýdyń bıologııalyq tazartýdan ótpeýi, kóktemde toǵan betindegi muzdyń erýi, toǵan túbine jınalǵan tunbalardyń tabıǵı shirý protsesi, býlaný deńgeıiniń artýy jáne jel baǵytynyń qalaǵa qaraı aýysýy. Toǵannan shyǵatyn kúkirtsýtek boıynsha normatıvter belgilenbegen, sebebi osyndaı toǵandardan shyǵatyn lastaýshy zattardyń shyǵaryndysyna qatysty normatıvtik-quqyqtyq aktiler men ádistemelik usynymdar joq. 2005 jyldan beri «Qyzyljar sý» JShS KOS-ty tehnologııalyq qaıta jaraqtandyrý ústinde, — delingen resmı jaýapta.
Vedomstvonyń málimetinshe, Petropavldaǵy KOS-ty jańǵyrtýdyń tórtinshi kezeńi 2013 jyldan beri júrgizilip keledi.
Jobalyq-smetalyq qujat jobasyna túzetý engizilip, jumys merzimi uzardy. Rekonstrýktsııa aıaqtalmaǵan.
— 2017 jylǵy tamyzdan bastap KOS-qa kelip túsetin aǵyndy sýdaǵy qatty bólshekterdi joıýǵa baǵyttalǵan mehanıkalyq tazartý paıdalanýǵa berildi. Bul kelesi kezeń — tabıǵı bıologııalyq tazartýǵa daıyndyq protsesi. Mehanıkalyq jáne bıologııalyq tolyq tazartý iske qosylǵannan keıin kúkirtsýtek ıisiniń qalaǵa taralý qaýpi aıtarlyqtaı tómendeıdi. 2021 jylǵy tamyzdan bastap «Sýdyń ǵylymı-tehnologııalyq ortalyǵy» JShS bıotoǵandy jasyl hlorella mıkrobaldyrlarynyń kómegimen bıologııalyq qalpyna keltirý jumysyn bastady. Qazirgi tańda hlorella sýspenzııasyn óndirý tehnologııasy men ony ósirýge arnalǵan jabdyq «Qyzyljar sý» JShS-ne berilgen jáne hlorellany «Bıotoǵan» jınaqtaýshy toǵanyna engizý jumystary jalǵasyp keledi, — deıdi mınıstrlik ókilderi.
Vedomstvo málimetinshe, SQO ekologııa departamenti jergilikti atqarýshy organdarǵa bul ekologııalyq máseleni sheshý úshin jergilikti bıýdjetten qarajat bólý qajettiligi jáne ony josparǵa engizý boıynsha hat joldaǵan.
Sonymen qatar, toǵandy tazartý jumystary boıynsha da usynystar jiberilgen.
Buǵan deıin Ekologııa jáne tabıǵı resýrstar mınıstrligi SQO-daǵy paıdalanylǵan ýran kenishterinen zııan joq ekendigin aıtqan edi.