Petropavlǵa kire beriste úsh kún boıy 30 shaqty júk kóligi qańtarylyp turdy
PETROPAVL. KAZINFORM — Artyq júk tıegeni úshin tekserýden jáne aıyppuldan qashpaq bolǵan júrgizýshiler 32 júk kóligin jol jıegine qaldyryp, ózderi oqıǵa ornynan ketip qalǵan.
Mamandardyń aıtýynsha, «Jol qaýipsizdigi» jedel-profılaktıkalyq is-sharasy aıasynda respýblıkalyq avtojolda kóliktik baqylaý ınspektsııasy, polıtsııa qyzmetkerleri jáne arnaıy maqsattaǵy jasaq birlesken baqylaý beketin uıymdastyrǵan.
Tekseris júrip jatqanyn bilgen júrgizýshiler kólikterin jol shetine, Petropavlǵa kire beriste tastap ketken.
— Avtomobıl joldaryn saqtaý jáne kólikterdiń qaýipsiz qozǵalysyn qamtamasyz etý maqsatynda oblys aýmaǵynda «Jol qaýipsizdigi» jedel-profılaktıkalyq is-sharasy ótip jatyr. Osyǵan baılanysty artyq júk tıegen kólik júrgizýshileri jaýapkershilikten qashyp, tarazydan ótpeý úshin qashyp otyr. Bul kólikterdiń barlyǵynyń júrgizýshileri, kimge tıesili ekeni anyqtaldy. Jylda myń shaqyrymǵa jýyq avtojol jóndeledi. Osyndaı ystyq kúnde kólikke artyq júk artý joldy búldiredi. Sol sebepti materıaldyq shyǵyndy óndirý úshin sotqa talap-aryz joldaımyz, — deıdi Soltústik Qazaqstan oblysy jolaýshylar kóligi jáne avtomobıl joldary basqarmasynyń basshysy Erden Shortybaev.
Basqarma basshysynyń aıtýynsha, qazirgi ýaqytta oblys joldarynda júk kólikterin ólsheıtin tórt arka — avtomattandyrylǵan tarazy ornatylǵan. Beınekamera ornatylǵandyqtan, burynǵydaı nómirdi jaýyp ótý múmkin emes.
Al júk kóligin júrgizýshiler qoldanystaǵy salmaq shekteýlerin saqtaǵan jaǵdaıda keıbir júk tasymalynyń ekonomıkalyq jaǵynan tıimsiz bolatynyn aıtady. Olardyń pikirinshe, osy sebepti keıbir kompanııalar artyq júk tıeýge májbúr.
Sondaı-aq júrgizýshiler mobıldi salmaq ólsheý beketteriniń qalalarǵa kireberiste ornalasýyn ádiletsiz dep esepteıdi. Qazir júk kóligi júzdegen shaqyrym jol júrip ótkennen keıin ǵana tekseriledi. Olardyń pikirinshe, qazirgi tájirıbe joldaǵy zań buzýshylyqtyń aldyn alýdan góri, aıyppul salýǵa kóbirek baǵyttalǵan.
Soltústik Qazaqstan oblysy polıtsııa departamentiniń málimetinshe, búginde jaǵdaı qalypqa keldi.
— 19 shilde kúni saǵat 14:30–da barlyq 32 aýyr júk kóligi júrgizýshilerimen profılaktıkalyq túsindirý jumystary júrgizilgennen keıin olar salmaqtyq baqylaý beketine baryp, ólsheý rásiminen ótti jáne óz baǵyttary boıynsha joldaryn jalǵastyrdy. Barlyq júrgizýshige qatysty ýákiletti memlekettik organdar Qazaqstan Respýblıkasynyń qoldanystaǵy zańnamasyna sáıkes tıisti sharalar qabyldady, — deıdi polıtseıler.
Qazaqstan zańnamasyna sáıkes, artyq júk tıegeni úshin qomaqty aıyppul qarastyrylǵan. Jeke kásipkerlerge júktiń salmaǵy belgilengen mólsherden 1–5 tonnaǵa artyq bolsa — 40 aılyq eseptik kórsetkish (AEK), 5–10 tonna aralyǵynda bolsa — 80 AEK, al 10 tonnadan artyq bolǵan jaǵdaıda 120 AEK kóleminde aıyppul salynady. Orta jáne iri bıznes sýbektileri úshin bul aıyppul kólemi budan da joǵary.
Buǵan deıin bıyl rekordtyq 11 myń shaqyrym avtojol jóndelip jatqanyn jazǵan edik.
