Petropavlǵa qonaqqa kelgen astanalyq ájeı joǵalyp ketti
PETROPAVL. QazAqparat – Petropavlda patrýldik polıtseıler Astanadan qonaqqa kelip, adasyp ketken 70 jastaǵy ájeıdi týystaryna tabystady. Umytshaqtyǵy bar zeınetker baǵdarsyz kóshe kezip, belgisiz bireýlerdiń kóligine otyrǵan, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqıǵa 9 qazan kúni bolǵan. Saǵat 12:30 shamasynda Petropavldaǵy «102» arnasyna qala turǵynynan habar tústi.
Ol Jumysshy kentiniń Karavannaıa kóshesinde adasyp qalǵan jáne kim ekenin aıta almaǵan ájeıdiń kelip onyń kóligine otyrǵanyn habarlady.
Oqıǵa ornyna patrýldik polıtsııa batalonynyń jaqyn jerdegi ekıpajy jiberildi. Keıin anyqtalǵandaı, 70 jastaǵy áıeldiń este saqtaý qabileti tómendegen.
Jeke qujattaryn tekserý kezinde onyń Astanada tirkelgeni anyqtaldy. Al Petropavlǵa ne sebepten kelgenin aıtyp túsindire almady.
Polıtseıler patrýldik kólikte zeınetkerdiń telefonyn qýattap, sońǵy nómirlerge qońyraý shaldy.
Ájeı Qyzyljar aýdanyndaǵy týysqandaryna qonaqqa kelgen. Alaıda, kóp uzamaı ushty-kúıli joǵalǵan. Bul ýaqytta aýdan ortalyǵynda ony týystary izdeı bastaǵan. Tártip saqshylary bir jarym saǵattan keıin ájeni abyrjyǵan sińlisine aman-esen tapsyrdy.
Polıtseıler mundaı oqıǵa qaıtalanbas úshin este saqtaý qabileti tómendegen týystarynyń qolyna árdaıym qýattalǵan uıaly telefon ustatýǵa keńes beredi.
Sondaı-aq, joǵalǵan adamnyń jeke basyn jáne týystaryn tez anyqtaý úshin baılanys derekteri bar jazbany qaltalaryna salyp qoıǵan jón.
SQO PD Krımınaldyq polıtsııa basqarmasynyń málimetinshe, jyl basynan oblys polıtsııasyna iz-tússiz joǵalǵandarǵa qatysty 402 ótinish kelip túsken.
Búgingi kúni 396 adam tabyldy.
