Petropavlǵa kelip joǵalyp ketken reseılik jigitke izdeý jarııalandy
PETROPAVL. QazAqparat – Soltústik Qazaqstan oblysynda Reseıden 12 tamyz kúni Petropavlǵa kelip, keıin iz-túzsiz joǵalǵan Aleksandr Kırjaǵa izdeý jarııalandy, dep habarlaıdy QazAqparat tilshisi.
Volonterler taratqan aqparatqa súıensek, Aleksandr Vıktorovıch Kırja 11 tamyz kúni «Petýhovo» temirjol stantsııasy arqyly Qazaqstanǵa ótken. Poıyzben Petropavlǵa kelip, habarsyz ketken.
Aleksandr Kırja Reseıdiń azamaty, 1998 jyly týǵan.
Boıy 194 sm, shashy qara, qoı kózdi.
Sol kúni ústinde qyzyl fýtbolka, kók shorty, qara bylǵary aıaq kıim jáne qolynda qara rıýkzagy bolǵan.
Jigitti kórgen-bilgender bolsa 8 777 307 99 65 nemese 102 nómirine habarlasa alady.
Birer kún buryn Petropavl polıtseıleri Jumysshy kentiniń 15 jastaǵy turǵynyna izdeý jarııalady. Qyz saǵat 19.00 shamasynda úıden ketip, qaıtyp oralmaǵan. Telefony óshirýli turǵan.
Jasóspirimdi izdeýge krımınaldyq polıtsııa, kólik patrýli, ýchaskelik jáne ıývenaldyq polıtsııa qyzmetkerleri jumyldyryldy. Volonterler men áleýmettik jelilerdiń tanymal paraqshalarynyń ákimshileri qosyldy.
Nátıjesinde qyzdy túnde Hromzavod shaǵyn aýdanyndaǵy tanystarynyń úıinen aman-esen taýyp aldy. Jedel ýákilder balany ata-anasyna tapsyrdy.
Jalpy jyl basynan beri habar-osharsyz ketken kámeletke tolmaǵandar týraly 68 ótinish tirkelgen. Barlyǵy tabyldy, kópshiliginiń júrgen jeri kezekshi táýlik ishinde anyqtaldy.
Foto: www.instagram.com/volonterypetropavl
