Petropavlǵa 5 blokpost qoıyldy
SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde syrqattanǵandardyń sany kúnnen-kúnge artyp keledi. Tek ótken aptada 42 adam KVI juqtyrǵan. Onyń ishinde 30 jaǵdaıda aýrý belgileri bolǵan. Aýyrǵandardyń 19-y Petropavl qalasyna jáne 8-i Qyzyljar aýdanyna tıesili.
Qazir Petropavl qalasynyń mańynda 4 blokpost jáne Qyzyljar aýdany Beskól aýylyna kireberis - «Jezqazǵan-Petropavl» tas jolynyń 935 km bir blokpost jumys istep jatyr.
«Halyq bul blokposttardan PTR testiniń nátıjesimen ǵana óte alady. Al qalaǵa nemese Beskólge kelip-ketip jumys isteıtinderde qoldarynda anyqtama bolýlary kerek. Sondaı-aq azyq-túlik jáne taǵy da basqa birinshi kezektegi taýarlardy tasıtyndarda osyndaı qujat bolýy qajet. Onda aty-jóni jazylady, qaı mekemeniń bergeni jáne basshysynyń qoly men móri bolýy kerek. Al jedel-járdem, órt sóndirý sekildi arnaıy qyzmetterdiń kóligi kedergisiz júrip jatyr», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Basqarma bastyǵynyń aıtýynsha, bir blokbekette 6 polıtsııa qyzmetkeri kezekshilik etedi. Jalpy bir táýlikte 60 tártip saqshysy osy 5 blokpostqa jumyldyrylatyn bolady.
