Petropavldyń Jumysshy kentinen qarý-jaraq jasyrylǵan oryn tabyldy

PETROPAVL. QazAqparat – Petropavlda jedel aqparatty tekserý kezinde qarý-jaraq jasyrylǵan oryn anyqtaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, óńir polıtseıleri Petropavlda ulttyq qaýipsizdik jáne qylmystyq atqarý júıesi komıtetteriniń departamentterimen birlesip qarý-jaraq jasyrylǵan oryndy tapty.

Qarý-jaraq oralǵan qara kenep qapshyq skotchpen oralyp, Petropavldaǵy Jumysshy kentiniń shetinde jasyrylǵan.

Oramanyń ishinde ańshy sholaq myltyǵy, boljam boıynsha Baıkal markaly tapansha, belgisiz markaly revolver, RGD-5 granatasynyń mýlıaji bolǵan.

Budan bólek, tegis uńǵyly jáne ıir oıyqty qarýdyń oq-dárileri: 7,62 mm 30 patron, 16-shy kalıbrli 53 patron, 12-shi kalıbrli 2 patron, 5,6 mm 6 patron, 9 mm 145 patron alyndy.

Atalǵan fakti QR Qylmystyq kodeksiniń 287-babynyń 3-bóligi boıynsha Sotqa deıingi tergep-tekserýlerdiń biryńǵaı tiziliminde tirkeldi.

«Qarý men oq-dáriler tárkilenip alyndy. Olar sot-ballıstıkalyq saraptamasyna jiberilip, atýǵa jarymdylyǵy jáne jasalǵan qylmysqa qatysy bar-joǵy tekseriledi. Sondaı-aq qarý men oq-dárilerdi zańsyz paıdalanǵan adamdy anyqtaý boıynsha jumys júrgizilip jatyr», - deıdi tártip saqshylary.

QR QK 287-baby 3-bóligi boıynsha qylmystyń osy túrine 5 myń AEK deıin aıyppul salýdan 5 jylǵa deıin bas bostandyǵynan aıyrý jazasy kózdelgen.