Petropavldyń jańartylǵan bas jospary 2019 jyldyń sońynda bekitiledi
PETROPAVL. QazAqparat – Petropavldyń bas josparyna ózgertýler engizý, alty yqshamaýdandy damytý jáne abattandyrý máseleleri oblys ákimi Qumar Aqsaqalov qatysqan qalalyq qurylys keńesiniń otyrysynda talqylandy, dep habarlaıdy QazAqparat tilshisi.
Soltústik Qazaqstan oblysy ákiminiń aıtýynsha, óńirde byltyrmen salystyrǵanda qurylys kólemi 12 % ósken. Oblys ortalyǵynda bıýdjettikpen qatar jekemenshik qurylys ta qarqyn alǵan. Al qalanyń bas jospary zaman talabyna saı emes. Sońǵy ret 2007 jyly ózgertýler engizilgen. Sáýletshilerdiń pikirinshe, Petropavl jınaqy shahar bolyp qala berýi kerek. Ol úshin eski úıler syrylyp, ornyna jańa nysandar boı kóterýi tıis. Byltyr oblys ortalyǵynda 600-den asa úı súrildi, bıyl bul jumys jalǵasyn tabýda. Jańa bas jospar jyl sońyna deıin daıyn bolady.
«Qalany ulǵaıtýdyń qajeti joq. Ol kóp qarjyny talap etedi. Biz eski ǵımarattardyń ornyna jańa baspana men nysandardy salýdy jalǵastyra beremiz», - dedi Qumar Aqsaqalov.
SQO ákimi baspasóz qyzmetiniń habarlaýynsha, otyrysta qaladaǵy shaǵyn aýdandardyń damýy týraly da sóz boldy. «Jas Órken», «Shyǵys», «ıÝbıleınyı», «Bereke» jáne «Kopaı» aýdandarynda jańa baspana, áleýmettik nysandar boı kótermek.
«Biz byltyr «Kopaı» shaǵynaýdanyna jelilerdi tartýdy josparladyq. Qazir búkil qala arqyly ınjenerlik jelilerdi sol jerge jetkizip, aýdandy damytpaq oıymyz bar. Qurylysty keshendi túrde júrgizý kerek», - dedi Qumar Aqsaqalov.
