Petropavldyń óz Arbaty paıda boldy
PETROPAVL. QazAqparat – Petropavlda sýretshiler men qolónershilerdiń, aqyn-jazýshylar men mýzykanttardyń basyn qosqan «QYZYLJAR» art-ortalyǵy jumysyn bastady, dep habarlaıdy QazAqparat tilshisi.
«QYZYLJAR» art-ortalyǵy – Soltústik Qazaqstan oblysynyń ákimi Qumar Aqsaqalovtyń bastamasy. Oblystyq tarıhı-ólketaný mýzeıiniń janynan ashylǵan ortalyqtyń qurylysy byltyr kúzde bastalǵan edi. Jergilikti bıýdjetten 120 mln teńge qarjy jumsalyp, nátıjesinde jańa mádenıet nysany boı kóterdi.
Ortalyq kóktem-jaz aılarynda jumys isteıdi. Qala turǵyndary men qonaqtary bul jerde sýretshilerdiń, qolónershilerdiń kórmelerin
tamashalap, ózderi de sýret salyp, kádesyı jasap úırene alady.
«Oblystyń barlyq sýretshileri men qolónershileri bul jerde óz kórmelerin
ótkizip, buıymdaryn saýdalaı alady. Sahna ornatylǵan. Ónerpazdardyń kontsertteri uıymdastyrylady. Ashyq aspan astyndaǵy kınozal bar.
Dámhanalar jumys isteıdi. Bizdiń maqsatymyz – demalýshylarǵa jaıly jaǵdaı jasaý», - deıdi SQO tarıhı-ólketaný mýzeıiniń dırektory Gúlnar Muqysheva.
Art-ortalyq negizgi úsh aımaqqa bólingen. Birinshisi – jármeńke ótetin jer, ekinshisi – túrli kórme zaldary bolsa, úshinshisi – qolónershilerdiń sheberhanalary.
Mádenı nysannyń ashylýyna kelgender jergilikti sýretshilerdiń «Shabyt» jáne Ýálıhanov aýdanynda júrgizilgen qazba jumystary kezinde tabylǵan jádigerlerdiń «Qyzyl oba qupııasy» kórmelerin tamashalaýǵa múmkindik aldy. Balalar da umyt qalmaǵan. Munda robototehnıka, papperkraft sııaqty túrli úıirmeler jumys isteıdi.
«Qyzyljar» art-ortalyǵy kúnde saǵat 10.00-23.00 aralyǵynda ashyq. Kirý tegin.
