Petropavldyń atyn «Qyzyljar» dep ózgertýge áli erterek - T. Sımambaev
ASTANA. Qyrkúıektiń 23-i. QazAqparat /Qanat Mámetqazyuly/ -Petropavldyń atyn «Qyzyljar» dep ózgertýge áli erterek. Búgin Parlament Senatyndaǵy jalpy otyrystan keıin jýrnalısterge bergen suhbatynda senator Tasbaı Sımambaev osylaı málim etti. Esterińizge sala keteıik, keshegi Parlament Májilisiniń jalpy otyrysynda depýtat Jarasbaı Súleımenov Petropavl qalasynyń ataýyn Qyzyljar dep ózgertý týraly másele kóterip, Úkimet basshysynyń atyna saýal joldaǵan bolatyn.
«Keıingi kezderi birqatar saıasatkerler qalalardyń ataýyn ózgertý týraly másele kóterip jatyr. Ózimniń saılaý okrýgim bolǵandyqtan Soltústik Qazaqstan oblysynyń ortalyǵy Petropavl qalasyn «Qyzyljar» dep ataý da usynylǵan. Bul usynys bir jaǵynan kerek bolsa, qajet emes tustary da barshylyq. Biz ózimizdiń jerlesterimizben zerteı kele, bundaı máseleniń kóterilýi áli de erterek ekendigin aıtqymyz keledi. Nege deseńiz qalada 60 paıyz orys halqy turady. Ýkraın, nemis basqa da ult ókilderi barshylyq. Solardyń bárin qurasaq soltústik óńirdegi salmaǵy 70 paıyzǵa tartady. Olardyń basym bóligi orys tilinde sóıleıdi. Sonyń bárin esepke alyp, qala ataýyn aýystyrýdy kóterý áli de erterek dep oılaımyz», dedi senator.
Sonymen qatar, depýtat telefon arqyly osy másele tóńireginde habar alysqanyn, oblystaǵy basqa ulttardyń «keıbir jerlerge, shirkeýlerge jınalyp» qala ataýyn aýystyrýǵa qarsylyq bildirmekshi eken. Tipti qol jınap jatqan jurt ta bar kórinedi. «Oblysymyzda tatý-tátti, áp-ádemi birlikte eńbek istep jatqan halyq bar. Al ataýdy ózgertetin ýaqyt áli erte, óz kezeginde isteý kerek», dedi ol.
