Petropavldyń 30 aýlasynda 1 mamyrǵa arnalǵan merekelik is-shara ótedi
PETROPAVL. QazAqparat - Qazaqstan halqynyń birligi kúni bıyl Petropavldyń ortalyq alańdarynda ǵana emes, 30 aýlada da atalyp ótpek, dep habarlaıdy QazAqparat tilshisi.
Mamyrdyń 1-i Petropavlda aýqymdy merekelik baǵdarlama josparlanǵan. Ortalyq kommýnıkatsııalar qyzmeti SQO fılıalynyń habarlaýynsha, is-sharalar kúndizgi 12.00-de oblys ortalyǵyndaǵy bas alańda «Bolashaǵymyz birlikte» kontserttik baǵdarlamasymen ashylmaq. Merekege SQO ákimi Qumar Aqsaqalov jáne QR Parlamenti Májilisiniń depýtattary Káribaı Musyrman, Sergeı Zvolskıı, Artýr Platonov, Quralaı Qaraken, Narıne Mıkaelıan, Magıram Maggeramovter jáne qala jurtshylyǵy qatysady.
Sondaı-aq, bul kúni «Qurmet» ordeniniń ıegeri, estrada juldyzy Tamara Asar óner kórsetedi dep josparlanǵan.
Petropavldyqtar men qala qonaqtaryna tosyn syı ázirlengen. Temirdi balshyqsha ıleıtin ǵalamat kúsh ıesi, 4 dúrkin álem rekordshysy, Qazaqstannyń 5 dúrkin rekordshysy, Gınnestiń rekordtar kitabyna 4 márte esimi jazylǵan Sergeı Tsyrýlnıkovtiń shoý baǵdarlamasy kórermenge usynylady.
Qazaqstan halqy Assambleıasy «Yntymaǵy jarasqan qazaq eli» atty ulttyq mádenıetterdiń oblystyq festıvalin ótkizbek. Ádettegideı sporttyq oıyndar da nazardan tys qalmaıdy. «Saqa» oıynynan jarys josparlanǵan.
Al ortalyq alańǵa barmaǵandar Qazaqstan halqynyń birligi kúnin óz aýlasynda merekeleýge múmkindik almaq. Uıymdastyrýshylardyń aıtýynsha, bıyl Petropavldaǵy 30 aýlada sahna ornatylyp, jergilikti ónerpazdar kontsert beretin bolady.
