Petropavldyń 23 jastaǵy turǵyny esirtki satqany úshin 10 jylǵa sottaldy

PETROPAVL. QazAqparat – Petropavldyń 23 jastaǵy turǵyny aldaǵy on jylyn maksımaldy qaýipsizdik rejımdegi qylmystyq-atqarý júıesi mekemesinde ótkizedi, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, bir jyl buryn soltústikqazaqstandyq polıtseılerge Petropavl turǵynynyń esirtki taratýǵa qatysy bolýy múmkin degen aqparat túsken. Jedel-izdestirý is-sharalary barysynda bul málimet rastaldy.

Jigittiń turǵylyqty jerinen qaýipti zattardyń túr-túri tabyldy, sonyń ishinde 30 gramnan astam mefedron men a-PVP sıntetıkalyq esirtkileri bar. Bul 500 dozadaı bolady jáne asa iri kólemge jatady.

Ol kórsetken «jasyryn» oryndardan polıtseıler MDMA tabletkalaryn nemese «ekstazı» ataýymen belgili metamfetamındi tárkiledi.

Ustalǵan azamat tergeý kezinde jáne sotta óziniń kinásin moıyndamaı, esirtkini jeke paıdalaný maqsatynda saqtaǵanyna sendirmekshi boldy. Alynǵan zattyń asa iri kólemde bolýyn ol esirtki saıtyn buzyp, bireýlerdiń jasyryn jerge tastap ketken esirtkilerin alǵanymen túsindirdi. Alaıda, óziniń aıtqan sózderine naqty dálel keltire almaǵan.

«QR Qylmystyq kodeksi 297-baby 3-bóliginiń sanktsııasy aıasynda esirtki saýdagerine 10 jylǵa bas bostandyǵynan aıyrý jazasy taǵaıyndaldy. Sońǵy jyldary esirtki saýdasyna qatysy bar adamdardyń ortasha jasy áldeqaıda tómendegen. Jastar ońaı aqsha tappaqshy bolyp, zańdy buzady. Jyl basynan oblysta esirtki satýǵa qatysty 16 úkim shyǵaryldy, onyń 9-y – 19-ben 25 jas aralyǵyndaǵy jastar», - deıdi SQO Polıtsııa departamenti Esirtki qylmysyna qarsy is-qımyl basqarmasy bastyǵynyń mindetin atqarýshy Ivan Terzıdı.