Petropavldyń 23 turǵyny maskúnemdikten májbúrli túrde emdelýge jiberildi
PETROPAVL. QazAqparat – Petropavldyń ýchaskelik polıtseıleri jyl basynan 23 adamdy májbúrli túrde maskúnemdikten emdelýge jiberdi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda jyl basynan spırttik ishimdik ishýdiń saldarynan 53 qylmys jasalǵan. Sonyń 12-sinde densaýlyqqa aýyr zııan keltirilgen. Alkogoldi tutyný kóp jaǵdaıda otbasylyq-turmystyq janjalmen aıaqtalady. Al maskúnemnen kóp jaǵdaıda týǵan-týystary zardap shegedi.
Petropavldyń 59 jastaǵy turǵyny onyń 35-tegi ulyn májbúrli túrde maskúnemdikten emdesin dep birneshe ret ótinish jazǵan. Er adam sońǵy 10 jyldan beri maskúnem retinde esepte tur. Esh jerde jumys istemeıdi, avtobýstardyń birinde kondýktor bolyp isteıtin anasynyń eńbekaqysyna kún kóredi. Araq-sharap ishken kúni janjal shyǵaryp, áıeldiń mazasyn alady. Al ol esin jıyp, túzelemin dep ýáde berisimen-aq anasy bergen aryzyn qaıtarady.
Sońǵy ret aryzben kelgende ýchaskelik polıtseıler áıeldi balasyn májbúrli túrde maskúnemdikten emdelýge jiberýge ruqsat berýge kóndirdi. Polıtsııa kapıtany Asyltas Janabekov qajetti qujattardy jınap, er adamǵa medıtsınalyq komıssııadan ótýge kómektesti. Naýryz aıynyń sońynda ol narkologııalyq ortalyqqa em alýǵa jatqyzyldy.
«Jyl basynan Petropavldyń ýchaskelik polıtsııa ınspektorlary 23 adamdy maskúnemdikten májbúrli túrde emdelýge jiberdi. Maskúnemder eshqashan ózdiginen araqty qoımaıdy. Bul úlken máselege kóz juma qaraýǵa bolmaıdy. Tek emdeý arqyly ǵana maskúnemdikpen kúresýge bolady. Qańtar aıynda Petropavlda 9 adam táýir bolýyna baılanysty esepten alyndy», - deıdi Petropavl qalalyq polıtsııa basqarmasy basshysynyń birinshi orynbasary Álibek Ǵabdýllın.
