Petropavldyń 16 kóshesine qazaqsha ataý berildi

PETROPAVL. QazAqparat – Petropavlda buǵan deıin nómirlenip kelgen 16 kóshe jańa qazaqsha ataýǵa ıe boldy, dep habarlaıdy QazAqparat tilshisi.

Petropavl qalalyq ákimdiginde «Solnechnyı-2» shaǵyn aýdanyndaǵy kóshelerge jańa ataý berý boıynsha jıyn ótti. Buǵan deıin qurylys, sáýlet jáne qala qurylysy bólimderinen jáne osy shaǵyn aýdannyń turǵyndarynan kóshelerdi jańasha ataý boıynsha 4 ótinish túsken. Jumys toby ony shilde aıynyń basynda qarady. Tıisti tártip boıynsha kóshelerdi jańadan ataý boıynsha materıaldar turaqty komıssııada qoǵamdyq tyńdaý ótkizý úshin Petropavl qalalyq máslıhatqa jiberildi.

Jumys tobynyń músheleri, sondaı-aq qalalyq máslıhattyń depýtattary, Petropavl qalasy ákimdiginiń ókilderi, oblys ortalyǵynyń turǵyndary ortaq sheshimge kele otyryp, buǵan deıin nómirlenip kelgen kóshe ataýlaryna mynadaı ataý berýdi jón kórdi:

№1 kóshe - Shańyraq,

№2 kóshe - Yntymaq,

№3 kóshe - Saıahat

№4 kóshe - Baıandy

№5 kóshe - Shabyt

№6 kóshe - Dýman

№7 kóshe - Aqqaıyń

№8 kóshe - Qaınar

№9 kóshe - Dostyq

№10 kóshe - Kókterek

№11 kóshe - Tatýlyq

№12 kóshe - Saryarqa

№13 kóshe - Ulytaý

№14 kóshe - Otbasy

№15 kóshe - Jarqyn

№16 kóshe – Orda dep ataldy.

«Ózderińiz baıqaǵan shyǵarsyzdar, kóshelerdiń bir de bireýine kisi atyn, ne aqynnyń ne tanymal tulǵanyń esimin bergen joqpyz. «Solnechnyı-2» qalanyń shetkeri aýdany, túsinispeýshilikter bolmaýy úshin osylaısha beıtarap, ári ádemi qazaqsha ataý berýdi durys dep taptyq», - deıdi Petropavl qalasy ákiminiń orynbasary Asqar Habıbýlın.