Petropavldyqtar jazda Mysyrǵa tikeleı usha alady
PETROPAVL. QazAqparat - Soltústik Qazaqstan oblysynyń Kásipkerler palatasy Sharm-el-Sheıh qalasyna tikeleı áýe reısin ashý týraly máseleni talqylady, dep habarlaıdy QazAqparat tilshisi.
Petropavldan mysyrlyq qalaǵa alǵashqy reıs 8 maýsymda oryndalady.
Oblystyq kásipkerler palatasynyń baspasóz qyzmetinen habarlaǵandaı, týroperatordyń ókilderi Mysyrda demalý qyzmetin jolǵa qoıý týraly aıtyp bergen.
«Biz Petropavl, Kókshetaý jáne Omby qalalaryndaǵy týrıstik agenttikterge áýe baǵdary týraly habardar ettik. Usynatyn qonaqúılerdi tanystyrǵymyz keledi. Qazirdiń ózinde ol qonaqúılerdiń nómirlerine brondaý júrgizilip jatyr», - dedi Shymkent qalasyndaǵy týroperatordyń satý bóliminiń basshysy Ekaterına Rýsova.
Onyń aıtýynsha, Qyzyl teńiz jaǵasyndaǵy demalys qyzmetin Petropavldyń kez kelgen týrıstik agenttigi uıymdastyra alady. Sharm-el-Sheıhtegi qonaqúılerdegi nómirdiń baǵasy bir adam úshin 500 teńge.
«Túrkııadaǵy demalys óte qymbat bolyp ketti. Sonymen qatar, kóptegen klıentterimiz jańa baǵyttardy izdeı bastady. Soltústik Qazaqstannyń azamattaryn Mysyrǵa tikeleı ushyryp, demalysqa jibere alatynymyzǵa qýanyshtymyz. Aımaqtyń aýdandary buǵan erekshe qyzyǵýshylyq tanytýda. Olar top-tobymen kelip, sapardy talqylaýdy josparlap otyr », - deıdi «Suntravel» týrıstik agenttiginiń dırektory Ella Androshýk.
Týrısterdi Boeing 757-200 ushaqtary jetkizbek. Petropavl qalasyndaǵy halyqaralyq áýejaıda ornalasqan ushaq bir rette 235 jolaýshyny alyp kete alady.
«Petropavldan tikeleı reısterdi uıymdastyrý týraly kelissózder sońǵy eki jyl boıy júrgizilip kelgen bolatyn. «Selfie Travel» kompanııasynyń ókilderi jyl boıy týrısterdi tıisti suranys bolǵan jaǵdaıda tasymaldaýǵa daıyn», - dep habarlaıdy oblystyq kásipkerler palatasynyń baspasóz qyzmetinen.
Avtor: Olesıa Jýkoven
