Petropavldyq jigit sheberhana ashyp, temir-tersekten kádesyı jasaýdy qolǵa aldy
PETROPAVL. QazAqparat – Petropavl qalasynyń turǵyny Álisher Hamzın memlekettik baǵdarlamanyń kómegimen óz kásibin ashyp, temir-tersekten biregeı kádesyı jasaı bastady, dep habarlaıdy QazAqparat tilshisi.
Túrli burandamalar, shaıbalar men gaıkalar, symdar men shynjyrlar – iske usaq-túıek temir-tersektiń bári jaraı beredi. Sheberdiń qolyna túsken bólshekter birer saǵattan keıin ádemi buıymǵa aınalady. Jalpy, Álisher Hamzın kádesyıdyń bireýin jasap shyǵýǵa shamamen 30 mınýttan, jumystyń kúrdeliligine qaraı birneshe saǵatqa deıin jumsaıdy eken.
«Birinshi kezeńde jasaıtyn zatyńa qaraı bólshekterdi tańdap alý qajet. Mysaly men saryshaıan pishinin jasamaq boldym. Ol úshin avtokólik nemese velosıpedtiń shynjyryn alamyn. Tazalap, balqytyp-biriktirip, artyq jerlerin kesip alyp tastaımyn. Eń sońynda syrlaımyn», - deıdi Álisher Hamzın.
Metall pishinderdiń ishinen janýar-jándikterden basqa túrli maman ıelerin kórýge bolady. Qarmaq salǵan balyqshy, fotoapparatyn qolǵa alǵan fotograf, barabanshy, gıtarıst, gir kótergen sportshy – sheber búginde fıgýralardyń otyzǵa jýyq túrin jasaıdy eken.
Ádette qytaılyqtar jurttyń ıdeıasyn júzege asyrsa, bul joly aspanasty elinde jasalǵan mototsıkldiń shaǵyn pishini Álisherge oı salypty. Osylaısha, bıznes-joba týǵan. Jas jigit ony júzege asyrý úshin «Bastaý» memlekettik baǵdarlamasyna júginedi. Arnaıy kýrstan ótip, kásipkerliktiń qyr-syryn meńgerip, qaıtarymsyz grant alady. Armany oryndalyp, shaǵyn sheberhana ashady. Qazir ózi sııaqty jastarmen kásipti dóńgeletip jatyr.
«Meniń negizgi mamandyǵym – ekonomıst. Qazirgi isimde bul bilimimniń de kómegi bar. Mundaı kádesyılardy Petropavlda ǵana emes, Qazaqstan boıynsha jasamaıdy. Biz alǵashqylardyń biri bolyp ashtyq», - deıdi kásipker.
Kádesyı jasaýdy temirden bastaǵan Álisher bolashaqta óndiriske aǵashty, áınek pen sazbalshyqty engizbek. Al kádesyılardy týrısterdiń qyzyǵýshylyǵyn týdyratyndaı qazaqy naqyshta oryndaýdy josparlaǵan.
