Petropavldyq zeınetker qala ortasynan mına taýyp aldy
PETROPAVL. QazAqparat – Petropavlda er adam garajdar mańynan mına taýyp aldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavl turǵyny mınaǵa uqsas tot basqan kúmándi metaldy ótken senbi kúni keshke taman Jambyl kóshesindegi garajdar mańynan taýyp aldy. Jarylǵysh zat sol jerdegi aǵashtyń túbinde jatqan. Zeınetker bul týraly birden jaqyn mańdaǵy ýchaskelik polıtsııa pýnktine baryp habarlaǵan.
Oqıǵa ornyna tabylǵan zatty tekserý úshin SQO Polıtsııa departamentiniń qyzmetkerleri men shuǵyl qyzmetter jetti. Olar kelgenge deıin tóńirek qorshaýǵa alynyp, qaýipsizdik sharalary jasaldy. Mamandar syrtyna qarap, tabylǵan zattyń qatty korrozııaǵa ushyraǵan tankige qarsy mına bolýy múmkin ekenin topshylaǵan. Tııanaqty tekserý men zertteýden soń boljam rastalyp, jarǵyshtehnık-mamandar ony joıý úshin arnaıy kólikke salyp alyp ketti. Keıin polıtsııa qyzmetkerleri 6637 áskerı bóliminiń polıgonynda jarylǵysh zatty joıdy.
Jarǵyshtehnık-mamandardyń aıtýynsha, tabylǵan zat – oqytýǵa arnalǵan mına. Qatty tot basqandyqtan jáne syrtqy tańbalary bolmaǵandyqtan, mınanyń naqty qaı jyly shyǵarylǵanyn anyqtaý múmkin emes.
Polıtseıler bul zattardyń syrtyn tot basyp, shirise de qaýpi joǵary ekenin eskertedi. Іshinde jarylǵysh zat bolýy múmkin. Bundaı zattardy taýyp alǵan jaǵdaıda birden ishki ister organdaryna habarlaý qajet. Polıtsııa qyzmetkerleri kelgenge deıin ony ornynan qozǵap, qolmen ustaýǵa bolmaıdy.
