Petropavldyq úshinshi ret mas bolyp kólik júrgizip ustaldy

PETROPAVL. QazAqparat – Petropavlda kólikti mas kúıde júrgizip, úshinshi márte polıtseılerdiń qolyna túsken júrgizýshiniń 5 jylǵa bas bostandyǵy shektelýi múmkin, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, 21 sáýirge qaraǵan túni patrýldik polıtsııa batalonynyń qyzmetkerleri Petropavldaǵy Jambyl kóshesinde tekserý úshin «BMW» avtokóligin toqtatqan. Rólde otyrǵan 21 jastaǵy júrgizýshi mas bolǵan. Ol aǵasynyń týǵan kúninen shyqtym dep aqtalǵan. Polıtseıler qala turǵynyn tekserip, onyń buryn eki ret mas kúıde kólik tizgindegeni úshin alǵashynda 3 jylǵa, keıin 6 jylǵa kólik basqarý quqyǵynan aıyrylǵanyn anyqtady.

Osyndaı sanktsııa ákimshilik jaza qoldanylǵannan keıin bir jyl ishinde qaıtalap zań buzýshylyq jasaǵan júrgizýshige qoldanylady. Endi ol qylmystyq jaýapkershilikke tartylmaq.

«Jas jigittiń iri mólsherde aıyppul tóleýi nemese 5 jylǵa bas bostandyǵy shektelýi múmkin. Sondaı-aq ol ómir boıyna kólik basqarý quqyǵynan aıyrylady. Zań talaptaryn elemeýge bolmaıdy. Mas júrgizýshilermen kúreske jol qaýipsizdigine arnalǵan barlyq jedel-profılaktıkalyq is-sharalarda basymdyq beriledi», - deıdi oblystyq Jergilikti polıtsııa qyzmeti basqarmasynyń bastyǵy Aıdyn Baımatov.

Jyl basynan beri oblysta buryn júrgizý quqyǵynan aıyrylǵan 18 mas júrgizýshi anyqtaldy.