Petropavldyq sırek kezdesetin revolver taýyp aldy
PETROPAVL. QazAqparat - Petropavldyq boıjetken óz ýchaskesinen taýyp alǵan sırek kezdesetin kóne revolverdi polıtsııaǵa tapsyrdy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Petropavldyq boıjetken Qyzyljar aýdanynda satyp alǵan ýchaskesin qarap júrip, kómbe taýyp alǵan. Qaptyń ishinen eki qosaýyz myltyq pen revolver shyǵypty.
«Revolver - sırek kezdesetin 1930 jyly shyǵarylǵan nagan bolyp shyqty. Bul qarý XIX ǵasyrdyń sońynda jasalǵan. Senimdi bolǵandyqtan álemniń kóptegen áskeri qoldandy. Keńes mılıtsııasy da onyń ózgertilgen túrin kópke deıin qoldandy», - deıdi mamandar.
Oljasyn boıjetken polıtsııaǵa tapsyrdy. Endi ol bul qarýlar úshin 130 myń teńgege deıin syıaqy alýy múmkin. 16 kalıbrli qosaýyz (TOZ-B jáne TOZ-63) myltyqtar 2-nshi sanatpen qabyldanatyn bolsa, ıaǵnı atýǵa jaramdy, árqaısysyna 53 025 teńge tólenedi. Al revolver 3-inshi sanatqa jatqyzyldy, ol úshin boıjetken 30 300 teńge alatyn bolady.
«Aktsııa aıasynda qarý tapsyrǵandar eshqandaı jaýapkershilikke tartylmaıdy. Polıtsııa ol qarýdyń qaıdan kelgenin qazbalap suramaıdy, árıne úıinde zańsyz saqtalǵan qarýdyń buryn qylmysqa qatysy bolmasa», - deıdi SQO PD Ákimshilik polıtsııa basqarmasynyń bastyǵy Jasulan Ospanov.
Sońǵy 3 aptanyń ishinde soltústikqazaqstandyqtar josparlanǵan qarý-jaraqtyń 70 % - 80 danasyn tapsyrǵan. Turǵyndarǵa 4,5 mln teńge syıaqy berilmek.
Polıtseılerdiń aıtýynsha, turǵyndar kóbine tegis uńǵyly qarýdy tapsyrady eken. Sapasyna qaraı 22 725,53-ten 75 750 teńgege deıin tólenedi. Qazir qarý-jaraqty tapsyrý boıynsha, sondaı-aq Maǵjan Jumabaev, Aıyrtaý jáne Taıynsha aýdandary alda keledi.
