Petropavldyq sheber kıizden kıim tigedi
PETROPAVL. QazAqparat - Oblystyq beıneleý óneri murajaıynda sándik-qoldanbaly óner sheberi Vera Imashbaevanyń «Kóktemgi órnekter» atty alǵashqy jeke kórmesi ótti, dep habarlaıdy «QazAqparat» HAA tilshisi.
QR Sýretshiler qaýymdastyǵynyń múshesi Vera Imashbaevanyń aıtýynsha, ol kesteleý, tigý, shilteri jáne monshaq órýmen, odan basqa da kóptegen qolóner túrlerimen aınalysady.
Óńirdegi alǵashqy qolónershilerdiń biri bolyp erekshe tehnıkany - feltıngti meńgergen. Kıizben kórkemdeý, óńdeý isi Vera Imashbaevany eliktirgeni sonshalyq, ol osy materıaldan kıim tige bastaǵan. Alǵashqyda dástúrli qazaq kilemderin - syrmaq pen tekemetti basady.
Keıinnen kıizden kádesyılaq, oıynshyqtar, áshekeıler jasap, avtorlyq bas kıimder, jáketter, palto tigýdi qolǵa alǵan. Vera Imashbaeva sándik pannolar jasaıdy. Kıiz óneri túrli janrlarda ázirlenip, erekshe áserge bóleıdi.
Sýretshi kıizden jasaǵan jumystarymen Almatyda ótken halyqaralyq kıiz sımpozıýmyna Soltústik Qazaqstan oblysynyń atynan qatysty. Sondaı-aq, Astanada ótken sándik-qoldanbaly óner sheberleri men sýretshileriniń shyǵarmashylyq kórmesinde jumystaryn tanystyrdy.
Murajaı mamandarynyń aıtýynsha, Vera Imashbaevanyń jumystaryn taný ońaı, sebebi onyń ózindik qalyptasqan stıli bar. Onyń jumystary Qazaqstannyń jeke kollektsııalarynda, sonyń ishinde Roza Rymbaevanyń, Reseı, Germanııa, Shvetsııa, Anglııa, Kanada men AQSh-ta qoıylǵan.
