Petropavldyq órt sóndirýshiler 7 jasar qyzdy qutqardy
PETROPAVL. QazAqparat - Petropavl qalasynda órt sóndirýshiler 7 jasar qyzdy ıis tııýden saqtap, aman alyp qaldy, dep habarlaıdy QazAqparat tilshisi.
Órt búgin tańǵy segizder shamasynda Brýsılovskıı kóshesindegi 61-úıdiń 3-shi qabatynan shyqqan. Órtengen páterde 60 jastaǵy áıel turady eken. Abyrjyp, sasqalaqtaǵan áıeldi oqıǵa ornyna jetken qutqarýshylar dalaǵa shyǵaryp, jedel járdem qyzmetkerlerine tabystady.
SQO TJD memlekettik til jáne aqparat tobynyń bas mamany Evgenıı Jýravlevtyń aıtýynsha, kópqabatty úıden barlyǵy 24 adam, sonyń ishinde 6 bala qaýipsiz jerge shyǵaryldy. Olarǵa medıtsınalyq kómek kerek bolǵan joq. Al, órt shyqqan páterdiń ústindegi tórtinshi qabatta bala qalǵanyn sol úıdiń turǵyndary aıtypty.
«Páterdiń esigin urǵylaǵanmen, eshkim ashpady. Buzyp kirmek bolyp edik, temir esik boı bermedi. Sol sebepti avtosatymen terezeden kirdim. Kók tútinniń ishinen 7 jasar qyzdy alyp shyǵyp, áriptesim Amanjol Qospanovqa berdim», - deıdi 3-órt sóndirý bóliminiń qaraýyl bastyǵy Andreı Şerbak.
Zardap shekken áıelmen jáne qyzben Tótenshe jaǵdaı departamentiniń psıhology jumys istedi. Mamandardyń aıtýynsha, qazir jaǵdaılary jaqsy.
Al, órt páterdegi tońazytqyshtan shyqqan. Oqıǵa ornyna der kezinde jetken qutqarýshylar onyń taralýyna jol bermeı, sóndirip aldy.
