Petropavldyq órt sóndirýshi erekshe kollektsııa jınady

Bolatjan Asqarbekovtyń aıtýynsha, kollektsııa jınaýǵa áýestik elimizde 1936-1952 jyldary qoldanysta bolǵan órt sóndirý kaskasynan bastalǵan. Óte nashar kúıde tabylǵan bas kıimdi tazalap, boıap, qalpyna keltiripti. Qazir toptamasynda mundaı kaskalardyń 22-si bar. Germanııa, Belarýs, Reseı, Ulybrıtanııa men Amerıka, Úndistan, Chehııa - álem elderiniń órt sóndirý shlemderiniń birin oǵan syıǵa tartsa, endi birin, mysaly, úndilik órt sóndirýshilerdiń sherýlik kaskasyn ınternet arqyly satyp alǵan.

«Men kollektsııa jınaýdy jańa bastaǵandar qatarynanmyn. Elimizde órt sóndirý qyzmetine qatysty buıymdardy jınaıtyn adamdar kóp emes, eki-úsheý ǵana. Men olarmen habarlasyp turamyn. «Seniń qolyńnan keledi, kózińde ot, eń bastysy qyzyǵýshylyǵyń joǵary» dep meni qoldap otyrady. Keı buıymdardy bir-birimizben almasyp jatamyz», - deıdi Petropavl qalasynyń turǵyny.

Bolatjan Asqarbekovtyń órt sóndirý qyzmetinde eńbek etip jatqanyna jıyrma jylǵa jýyq. Qatardaǵy órt sóndirýshiden bastaǵan ol búginde tótenshe jaǵdaılardy joıý bóliminiń bastyǵy, podpolkovnık sheninde. Aıtýynsha, kollektsııasyndaǵy buıymdardyń bári de ol úshin qymbat, degenmen, arasynda janyna ystyq bireýi bar eken.

«Mynaý - meniń jaýyngerlik kaskam. Bul bas kıimdi úsh jyl kıdim. Onymen talaı adamnyń ómirin ólimnen arashalap qaldym. Órt sóndirý kezinde túrli jaǵdaılar bolyp jatady, basqa bórene qulap nemese gaz ballony jarylǵan kezder de boldy. Ol da meni talaı saqtap qaldy», - deıdi Bolatjan Asqarbekov.

Bolatjan Edýardulynyń kollektsııa jınaýmen aınalysqanyna bıyl 8 jyl. Túrli kaskalardan basqa júzge jaqyn shevron, magnıt, qalamsap, jınaq sandyqsha retinde jasalǵan kádesyılar toptamasy bar. Onyń ermegin biletin dostary men tanystary barǵan jerlerinen órt sóndirýge qatysty syılyq-buıymdardy ákelýdi dástúrge aınaldyrypty.