Petropavldyq oqýshy óz otbasyn ólimnen qutqaryp qaldy
PETROPAVL. QazAqparat - Petropavl qalasyndaǵy № 44 orta mekteptiń 7 «A» synyp oqýshysy, 13 jasar Nıkıta Kýkýshkın óziniń otbasyn gazdan ýlanýdan qutqaryp qaldy, dep habarlaıdy «QazAqparat» HAA tilshisi SQO TJD baspasóz qyzmetine silteme jasap.
Oqıǵa 28 qańtar kúni túnde Jumysshylar kenti, Lozovskıı kóshesindegi úıde oryn alǵan. Otbasynyń jalǵyz uly Nıkıta tútinniń ıisine tunshyǵyp, basy aýyrǵan soń oıanyp ketedi. Ata-anasy men baýyrlary uıyqtap jatqan bólmege baryp, olardy oıatqysy keledi. Alaıda, onyń aıqaıyna eshkim ún qatpaǵan. Ol ata-anasynyń uıaly telefonyn alyp, jedel járdem dıspetcherine qońyraý shalady jáne úıdiń naqty meken jaıyn beredi.
Medıtsına mamandary habarlamany órt sóndirý qyzmetiniń kúshteri men quraldaryn jedel basqarý ortalyǵyna joldaıdy.
Oqıǵa ornyna jetken qutqarýshylar ysyp turǵan jylytý peshiniń ústinde tamaǵy bar tabanyń qalyp qoıǵanyn kóredi. Órt sóndirýshiler TJ ornynan tórt eresek adamdy qutqaryp, medıtsına qyzmetkerlerine tabystaǵan. Iis tıip ýlanǵan Nıkıta oblystyq balalar aýrýhanasyna jatqyzyldy.
Keshe SQO TJD bastyǵynyń orynbasary Nurlan Atyǵaev mektep jıynynda Nıkıta Kýkýshkındi saltanatty túrde alǵys hatpen marapattap, uıaly telefon syılady. «Bizdiń qyzmetke óziń sekildi erjúrek, batyl, basqalarǵa kómektesýge árdaıym daıyn turatyn balalar qajet. Sondyqtan, mektep bitirgennen keıin qutqarýshy bolamyn deseń, qýana qarsy alamyz!», - dedi Nurlan Atyǵaev.
Nıkıta syılyqqa rızashylyǵyn bildirip, onyń buǵan deıin uıaly telefony bolmaǵanyn jáne ol týraly qatty armandaǵanyn aıtty. Endi ol árdaıym baılanysta bolady.
