Petropavldyq oqýshy kún bıovegetarııiniń jobasyn ázirledi
PETROPAVL. QAZAQPARAT - Nazarbaev Zııatkerlik mektebiniń 9-synyp oqýshysy Aleksandr Vaşenko bıologııa jáne fızıka muǵalimderimen birge kún bıovegetarııiniń jobasyn ázirledi, dep habarlaıdy «QazAqparat» HAA tilshisi.
Oqýshy bıovegetarııdiń jyl boıy ekologııalyq taza jemis-kókónis ósirýge múmkindik beretinin aıtady. Onyń negizinde - kún, sý jáne jylý energııasy jatyr. «Bıovegetarııde ósirilgen jemister tabıǵı ári qaýipsiz bolady. Bul úlken tabystyń da kózi. Tutynýshylar dúkendegige qaraǵanda osyndaı ónimderdi kóbirek tańdaıtynyna senimdimin. Bıovegetarıı qondyrǵysynda jemister jyl boıy óse beredi», - deıdi Aleksandr Vaşenko.
Qondyrǵynyń tirekteri jeldiń kúshine shydas berýi úshin erekshe aerodınamıkalyq formada jasalǵan, al jylytylǵan qabyrǵalar termos qyzmetin atqarady. Bıovegetarııdiń tóbesi móldir, jylyjaıǵa kún sáýlesi men jylý jetispeı jatsa, jeldetkishter ózdiginen qosylady. Temperatýrany retteýishterden tys, jylyjaıdyń jaryqpen qamtamasyz etilýin, topyraq pen aýanyń ylǵaldylyǵyn, kómirqyshqyl gazdyń kontsentratsııasyn baqylap otyratyn arnaıy «saǵattar» da eskerilgen. Hımııalyq tyńaıtqyshtardan tys, avtorlar bıoshirindilerdi paıdalanýdy usynyp otyr - ony jaýynqurttar shyǵarady.
«Jylyjaıda jaýynqurttar kóbeıetin arnaýly oryn bolady, olar qorektik qaldyqtardy ónimdilikti arttyratyn bıoshirindige aınaldyrady. Aldaǵy ýaqytta qandaı jaýynqurttar bıoshirindini kóbirek shyǵaratyny týraly joba jasamaqshymyn», - deıdi Aleksandr.
Jańa jylyjaı jobasynyń quny shamamen 15 mln teńge.
