Petropavldyq maıdanger Djýra Kobelev 102 jasqa toldy

PETROPAVL. QazAqparat - Petropavl qalasynyń turǵyny, Ekinshi dúnıejúzilik soǵys ardageri Djýra Kobelev 102 jasqa toldy. Týǵan kún ıesin soltústiqazaqstandyq polıtsııa ókilderi quttyqtady, dep habarlaıdy QazAqparat tilshisi.

SQO PD baspasóz qyzmetiniń habarlaýynsha, Djýra Kobelev 1917 jyly 2 mamyrda Ózbekstanda kópbalaly sharýanyń otbasynda dúnıege kelgen. Qyzyl Áskerge kavalerıst retinde shaqyrylyp, Stalıngrad mańyndaǵy qandy urystarǵa qatysqan. Soǵysta qatty jaraqat alyp, Qazaqstanda emdelgen.

1945 jyldan keıin maıdanger ishki ister organdaryna qyzmet etýge jiberildi. Mılıtsııada Djýra Kobelev zeınetke deıin túrli laýazymdarda eńbek etti. Ardager soǵysyp qana qoımaı, mılıtsııada da eńbek etkenin maqtan tutady.

Jyldaǵy dástúr boıynsha maıdangerdi SQO PD bastyǵynyń orynbasary Qapez Dáýletbaev, qalalyq Polıtsııa basqarmasynyń bastyǵy Jandos Muqatov, sondaı-aq ardagerler keńesiniń tóraǵasy Serǵazy Jumaǵulov bastaǵan zamandastary quttyqtady. Olar Djýra Kobelevke myqty densaýlyq, balalary, nemereleri men shóbereleriniń qýanyshtaryna kýá bolyp júrýin tiledi.

102 jasqa kelgen aqsaqal ofıtserlerdiń jyly lebizine rıza bolyp, óz kezeginde kele jatqan Jeńis kúnimen quttyqtady.

Qazirgi tańda oblystyń ishki ister organdarynda eńbek etken soǵystyń 4 ardageri bar. Olar árdaıym tártip saqshylarynyń nazarynda.