Petropavldyq kelinshek lombardqa 1,3 mln teńgege jalǵan altyn buıym ótkizgen
KÓKShETAÝ. QazAqparat - Kókshetaýda jalǵan altyn buıymyn jergilikti lombardtardyń birine 1,3 mln teńgege ótkizip jibergen petropavldyq 27 jastaǵy kelinshek ustaldy, dep habarlaıdy QazAqparat tilshisi.
ІІD baspasóz qyzmetiniń málimeti boıynsha aǵymdaǵy jyldyń 5-shi qarashasynda Kókshetaýdaǵy lombardtardyń birine belgisiz kelinshek quny 1 380 000 teńgeniń altyn buıymyn ótkizedi. Sarapshy atalmysh altyn buıymdy tekserip, qolma-qol aqshasynda sanap bergen. Keıin arada 2 kún ótkennen soń lombard qyzmetkerleri álgi altyn buıymdy qaıta taǵy bir ret tekserip shyǵady. Nátıjesinde onyń beti ǵana altynmen jyltyratylǵan jalǵan buıym ekenin anyqtaıdy. Artynsha, polıtsııaǵa aryz túsiredi.
«Polıtseıler kúdiktiniń Petropavl qalasynyń 1990 jyly týǵan turǵyny ekenin anyqtady. Odan túsinikteme alyndy. Kúdiktiniń sózinshe, mura retinde berilgendikten ol altyn buıymnyń osyǵan deıin jalǵan ekenin bilmegen. Oǵan qosa, kelinshektiń ózi de Petropavldaǵy lombardtardyń birinde jumys isteıtini belgili boldy», dep kórsetilgen habralamada.
Qazirgi kezde, QR QK 190 babynyń 1 bólimi boıynsha sotqa deıin is qozǵalyp, oqıǵanyń mán-jaıy anyqtalý ústinde.
