Petropavldyq kásipkerge oq atqan 2 kúdikti ustaldy
PETROPAVL. QazAqparat – Petropavlda tártip saqshylary kásipkerge oq atyp, jaralaǵan eki kúdiktini ustady, dep habarlaıdy QazAqparat tilshisi.
Eske sala keteıik, taıaýda belgisiz bireýler Petropavl qalasynda bıznesmenge shabýyl jasap, oq atqan bolatyn. SQO polıtsııa departamenti baspasóz qyzmetiniń málimetinshe, qazirgi ýaqytta osy qylmysqa qatysy bolýy múmkin degen kúdikpen Qyzyljar aýdanynan 1997 jyly týǵan jáne Petropavl qalasynan 1990 jyly týǵan eki jigit ustalyp, qamaýǵa alyndy.
Buǵan deıin bul fakti Sotqa deıingi tergep-tekserýdiń biryńǵaı tizilimine «Buzaqylyq» baby boıynsha engizilse, ol tergeý barysynda «Densaýlyqqa qasaqana aýyr zııan tıgizý» babyna ózgertildi.
«Qazirgi ýaqytta istiń mán-jaıy, barlyq qatysty adamdar, olardyń osy qylmysqa qatysy bar-joǵy anyqtalyp jatyr. Birneshe tıisti saraptama júrgiziledi. Qylmystyq istiń tergeý barysy, protsessýaldyq sheshimderdiń zańdylyǵy jáne negizdiligi polıtsııa departamenti basshylyǵynyń, oblys jáne qala prokýratýrasynyń qadaǵalaýynda», - delingen habarlamada.
Qylmystyq oqıǵa 26 tamyz kúni, tańǵy 4.00-ter shamasynda bolǵan. Zardap shegýshi aýyr halde oblystyq aýrýhanada jatyr.
