Petropavldyq qarııa velosıpedimen Almatyǵa attandy
PETROPAVL. QazAqparat – Petropavl turǵyny, marafonshy, 67 jastaǵy Qazybek Bekeev velosıpedke otyryp, Almatyǵa attandy. Qarııa bul saıahatyn el Táýelsizdiginiń 30 jyldyǵyna arnamaq, dep habarlaıdy QazAqparat tilshisi.
Qazybek Bekeev eki dońǵalaqty kóligin saılap, búgin tańerteń Almaty qalasyna saparǵa shyqty. Ol 2 myńǵa jýyq shaqyrymdy eki aptanyń ishinde júrip ótpek.
Jeńil bolý úshin ózimen eń qajetti degen zattardy ǵana: birer kıim, jatyn qap, azyn-aýlaq tamaq pen ishetin sý ǵana aldy.
Qazybek Kákimuly bıyl 67 jasqa tolǵan. SQO Aqqaıyń aýdany Aralaǵash aýylynyń týmasy.
Kóp jyldar boıy aýyl sharýashylyǵy salasynda eńbek etti.
Keıin Petropavlǵa kóship, 2000 jyldan beri jeńil atletıkamen aınalysyp júr.
«Úlken-úlken jarystarǵa, marafondarǵa qatystym. 2014 jyly Reseıde erler arasynda ekinshi oryn alǵanmyn. Taǵy da 34-qabatqa júgirip shyqtyq. Onda da daıyndalmastan estip kirip, jastarǵa ese jibermeı 4-oryn aldym. 50 jasqa deıingiler qatysqan edi. Al men 60-tan asyp ketkenmin, uıymdastyrýshylar qatystyrǵysy kelmedi. «Sen óte almaısyń» dep. Túrkııada eki ret marafonǵa qatystym», - deıdi Qazybek Bekeev.
Bul - qarııanyń qos dońǵalaqty serigimen alys saparǵa shyǵyp otyrǵan birinshi saıahaty emes.
Byltyr Qazybek Kákimuly velosıpedpen Nur-Sultan qalasynan keldi.
Aıtýynsha, saǵatyna orta eseppen 30 km jyldamdyqpen júredi. Almatyǵa barar jolda táýligine 200 shaqyrymdy artqa tastap otyrmaq.
«Bul saparymdy bıylǵy mereıtoı – Qazaqstan Táýelsizdiginiń 30 jyldyǵyna arnaımyn. Salamatty ómir saltyn ustanýdyń nátıjesinde ózimdi jaqsy sezinemin. Meniń isim basqalarǵa úlgi bolsa eken», - deıdi alys jolǵa attanǵan qarııa.
