Petropavldyq egiz bala Azııa chempıonatynda grek-rım kúresinen altynnan alqa taqty
PETROPAVL. QazAqparat – Petropavldyq egiz bala Raýan men Narıman Bekimovter Qyrǵyzstannyń Bishkek qalasynda ótip jatqan Azııa chempıonatynda grek-rım kúresinen chempton atandy, dep habarlaıdy QazAqparat tilshisi.
Bul kúnderi Qyrǵyzstannyń Bishkek qalasynda kadetter arasynda (U17) jáne 23 jasqa deıingi (U23) jastar arasynda grek-rım, áıelder jáne erkin kúresten Azııa chempıonaty ótip jatyr. Baıraqty dodaǵa 21 eldiń sportshylary qatysýda.
Osy jarysta Soltústik Qazaqstan oblysynyń eki sportshysy grek-rım kúresinen chempıon atandy. Raýan men Narıman Bekimovter – egizder. Azııa chempıonatynda 51 keli salmaqta kúresken Raýan Bekimov aqtyq oıynda qyrǵyz sportshysymen kezdesip, 8:0 esebimen taza jeńiske jetti. Al Narıman Bekimov ózbek sportshysyn 8:2 esebimen jeńdi. Osylaısha ekeýi de sport sheberiniń normatıvin oryndady.
Aǵaıyndylar Petropavldaǵy oblystyq olımpıada rezerviniń mamandandyrylǵan mektep-ınternat-kolledjinde oqıdy. Bıyl 11 synypqa kóshti.
«Raýan men Narıman bizge 7 synypta keldi. Olar Petropavlda týǵan. Ekeýinen zor úmit kútemiz. Aıaq alystary jaman emes. Tek bıyl Raýan Frantsııada ótken HHІH Búkilálemdik jazǵy gımnazııadada kúmis júldeni enshiledi. Narıman osynyń aldynda ǵana Túrkııanyń Antalııa qalasynda ótken halyqaralyq týrnırde 2 oryn aldy. Ol Qazaqstan quramasynyń sapynda óner kórsetken edi», - deıdi oqý ordasynyń grek-rım bóliminiń ádiskeri Gúlmıra Shaımerdenova.
Azııa chempıondaryn jarysqa daıyndap aparǵan jattyqtyrýshy Seráli Qusaıynovtyń aıtýynsha, balalar ózderine artylǵan senimdi aqtaı bildi.
«Ekeýi de minezdi sportshy, boz kilemde sońyna deıin kúresedi. Osy chempıonatqa biz tek jeńispen oralamyz dep maqsat qoıyp bardy. Jalpy sportqa 12 jasta kelgen. Tórt jyldyń ishindegi nátıjeleri jaman emes», - deıdi Seráli Qusaıynov.
Narıman men Raýan Bekimovter grek-rım kúresinen Álem chempıonatyna joldama aldy. Kadetter arasyndaǵy jarys 25 shilde kúni Italııada bastalady.
