Petropavldyq dárigerler turǵynnyń tynys jolyna turyp qalǵan tisti alyp shyqty
PETROPAVL. QazAqparat - Petropavlda dárigerler turǵynnyń óńeshinen ótip keńirdegine turyp qalǵan tisti alyp shyqty, dep habarlaıdy QazAqparat tilshisi.
Bul týraly dárigerler Soltústik Qazaqstan oblystyq aýrýhanasynyń Feısbýktegi paraqshasynda bólisti.
Mamandardyń aıtýynsha, oqys oqıǵa 25 sáýirde bolǵan. Syrqat tisin baıqaýsyzda jutyp qoıypty. Bóten zat keńirdektiń oń taramyna ketip, demalýyna qıyndyq týdyrǵan.
Oblystyq aýrýhana jáne týberkýlezge qarsy dıspanserdiń dárigerleri birden syrqatty operatsııaǵa ázirledi. Alaıda, ota jasaýdyń qajeti bolmady. Endoskopııalyq ádispen turyp qalǵan tis alyndy. Qazir, mamandardyń aıtýynsha, syrqattyń jaǵdaıy qanaǵattanarlyq.
